لما يجينا مريض بعاني من قسوة أو سُماكة في كف يدو أو باطن قدمو أو تشقق فيهم، أول حاجة بنعاين ليها هي الشكل والتوزيع، السُماكة دي أبداً ما حاجة واحدة، وبتجي في صور هندسية مختلفة كل واحدة فيها بتدينا مفتاح سري لمرض معين أو سبب مختلف ورا المشكلة دي.
مرات السُماكة بتكون شاملة وعامة، يعني بتلقى راحة الكف كلها أو باطن القدم كلها عبارة عن طبقة قاسية وسميكة متجانسة، لونها غالباً مايل للاصفرار ومحددة بخط واضح بفصلها عن الجلد الطبيعي، ودي بنسميها السُماكة الكاملة أو المنتشرة، زي كأنو الزول لابس ليهو قفاز أو شراب مصنوع من كيراتين صلب.
وفي مرات تانية، السُماكة دي بتكون محددة وبتختار أماكن معينة بس، تحديداً الأماكن البنزل فيها ثقل جسمك أو بحصل فيها احتكاك شديد ومستمر زي كعب الكراع أو تحت رؤوس العظام في مشط القدم، ودي بنسميها السُماكة البؤرية أو المتركزة في مناطق الضغط.
لكن الموضوع ما بيقيف هنا، في أشكال تانية غريبة بتجي زي حبيبات صلبة وقاسية متناثرة في الكف أو القدم كأنها قطرات مطر متحجرة أو بذور صغيرة مدفونة جوه الجلد، ودي بنعرفها بالسُماكة النقطية.
وفي نوع رابع وأخير بيظهر في شكل خطوط أو شرائط طولية قاسية ممتدة على طول الأصابع، ودي بنسميها السُماكة الخطية.
عشان نفك اللغز ده في العيادة، بنراقب خاصيتين مهمات جداً بيشكلوا فارق كبير في التشخيص، الخاصية الأولى بنسميها طبياً "التعدي" (Transgrediens)، ودي بنقصد بيها إننا نشوف هل السُماكة دي التزمت بحدود باطن الكف والقدم، ولا "اتعدت" حدودها وزحفت لظهر اليد أو ظهر القدم، التعدي ده علامة مميزة بتوجهنا طوالي لأمراض جينية معينة.
الخاصية التانية بنسميها "التقدم" (Progrediens)، يعني هل السُماكة دي ظهرت في مساحة معينة وثبتت على كدة، ولا كل ما العمر يتقدم هي بتزيد وتتمدد وتأكل مساحات جديدة من الجلد السليم؟
يعني ملاحظتك الدقيقة لمتين بدأت السُماكة، وشكلها كيف، وهل هي محصورة ولا بتزحف، بختصر علينا كدكاترة مشوار طويل وبخلينا نخت للغز ده الحل الصحيح أسرع
في البوست الجاي، حنتكلم عن أكتر نوع بيقابلنا في حياتنا اليومية وبخلي المشي حرفياً زي العذاب: الثفن، الكالو، وعين السمكة، وكيف نفرق بينهم.
#عيادات_بيت_العافية
#عيادة_الجلدية_أون_لاين