كلنا بنسمع عن الكولاجين وإنه هو الأساس لشد البشرة وشبابها، لكن الكولاجين ده براهو عبارة عن خيوط متفرقة ما بتقدر تصلب طولها وتعمل حيطة متماسكة من غير "أسمنت" يربطها ببعض بقوة.
الأسمنت ده في جسمنا هو فيتامين سي، لكن ربنا خلق أغلب الحيوانات بتقدر تصنع فيتامين سي براها جوة جسمها، إلا نحنا البشر فقدنا الإنزيم المسؤول عن التصنيع ده وبقينا معتمدين اعتماد كلي على إننا ندخله من برة عن طريق الأكل.
ولأنو فيتامين سي من عائلة الفيتامينات اللي بتدوب في الموية زي ما شرحنا قبل كدة، فهو ما بتخزن لفترات طويلة، وأي نقص حاد فيهو بيظهر طوالي على شكل انهيار في بنية الجلد.
زمان، البحارة البقضوا شهور طويلة في عرض البحر من غير خضار وفواكه طازجة، كانوا بصابوا بمرض مرعب اسمه "الإسقربوط" أو مرض البحارة، وكان ببدأ يظهر في الجلد بشكل غريب جداً، لأنو الأسمنت بتاع الكولاجين بيكون انعدم، فبتبدأ الأوعية الدموية الصغيرة تضعف وتنزف تحت الجلد، وتحديداً بتلقى نقط نزيف صغيرة محاوطة بصيلات الشعر، والشعرة ذاتها بتفقد استقامتها وتطلع ملتوية ومكعوجة زي "الزنبرك" أو فتاحة الفلين، دي كانت علامات إنذار مبكرة بإنو الجسم بفقد بنيته الأساسية من جوة
في زمنا ده، الإسقربوط بقى نادر جداً، لكن ظهرت مكانه خرافة تجارية ضخمة، وهي إنك تمشي تبلع كبسولات أو تشرب فوار فيتامين سي بجرعات عالية جداً بهدف نضارة وتفتيح البشرة.
طبياً، الكلام ده ما دقيق ومضيعة للقروش، لأنو جسمك ذكي جداً فبياخد كفايتو البسيطة من فيتامين سي للعمليات الحيوية وللمناعة، وأي كمية زيادة بيقوم يرميها طوالي برة الجسم مع البول، عشان كده، لو هدفك علاجي وتجميلي بحت للبشرة زي تفتيح التصبغات وتحفيز الكولاجين الموضعي، الحل العلمي المعتمد هو استخدام سيروم فيتامين سي الموضعي مباشرة على الجلد، لأنو بصل بتركيز عالي للمكان المطلوب من غير ما يتفلتر ويضيع في الدورة الدموية.
لكن هنا بتواجهنا مشكلة عملية بتظهر كتير في العيادات، وهي إنو السيرومات الفعالة والنقية من فيتامين سي بتكون حمضية جداً، وفي ناس بشرتهم حساسة أو عندهم وردية أو حاجزهم الجلدي متضرر، ديل ما بستحملوه خالص وأول ما يختو السيروم بحسوا بحرقان وحمار وتهيج شديد.
لو إنت من الناس ديل، ما تغصب بشرتك على حاجة بتأذيها وتواصل فيها عناد، لأنو الالتهاب ده بجيب نتايج عكسية تماماً وبيزيد التصبغ بدل ما يعالجو، البديل الطبي الآمن والممتاز ليك هو إنك تفتش عن مشتقات فيتامين سي اللطيفة في المنتجات (مثل أسكوربيل جلوكوسيد (Ascorbyl Glucoside)، مغنيسيوم أسكوربيل فوسفات (MAP)، وتيتراهيكسيل ديسيل أسكوربات (THD))
أو تستغنى عنه تماماً وتلجأ لبدائل بتدي نفس النضارة والتفتيح لكن ألطف وأبرد على الجلد، زي سيروم النياسيناميد أو حمض الأزيليك، ديل بيشتغلوا بهدوء ومن غير جوطة وتهيج، وبيحافظوا ليك على حيطة بشرتك قوية ومستقرة.
#عيادات_بيت_العافية #عيادة_الجلدية_عن_بعد #جلدك_مراية_أكلك