كلنا بنعرف فطريات الكرعين البتجي بين الأصابع وتعمل قشرة وحكة، أو تخلي كعب الكراع قاسي ومقشر، لكن مرات الفطريات دي (تحديداً نوع اسمه ترايكوفايتون) بتهيج فجأة وبتقرر تغير خطتها، وتعمل لينا حالة حادة جداً بتظهر في شكل بقاقات مشدودة ومليانة موية في باطن القدم أو قوس الكراع.
القصة وما فيها إنو الفطريات دي عشان تعيش وتتغذى على طبقة الكيراتين في جلدنا، بتفرز إنزيمات هاضمة بتذوب الكيراتين وتخلي خيوط الفطر تدخل وتخترق الطبقة السطحية للجلد، الحركة دي بتستفز جهاز المناعة وبتعمل استجابة التهابية وحساسية شديدة لبروتينات الفطر، بتخلي الموية تتجمع بين الخلايا وتفصلها من بعض وتعمل لينا البقاقات المزعجة دي.
لكن الخدعة الكبيرة والمحيرة في الموضوع ده هي حاجة بنسميها طبياً "تفاعل إيد" (Id reaction). تخيل إنو تكون الفطريات شغالة حفر في كرعينك، وفجأة تلقى بقاقات صغيرة معقمة (ما فيها أي فطر جوة الموية بتاعتها) ظهرت ليك في يدينك أو أماكن تانية بعيدة في جسمك!، دي عبارة عن رد فعل تحسسي عنيف جداً من الجسم ضد مستضدات الفطر اللي في الكراع. يعني يدك بتدفع ضريبة المشكلة الحاصلة تحت في كراعك.
بيئتنا الحارة والرطبة، واللبس المتواصل للشرابات والجزم المقفولة، أو استخدام الحمامات المشتركة من غير تجفيف الكرعين كويس، دي كلها بتعمل "حضانة" ممتازة للفطريات دي عشان تتكاثر وتعمل البقاقات دي
وعشان الدكتور يتأكد وما يدي علاج مناعي بالغلط، بيشيل قشرة بسيطة ويفحصها بمحلول (KOH) تحت المايكروسكوب عشان يشوف خيوط الفطر بعينه المتدسية جوه الجلد، أو بيلقاها محشورة زي الساندوتش في فحص الأنسجة.
فلو ظهرت ليك بقاقات في يدك، قبل ما تفتكرها حساسية في الدم أو مرض مناعي خطير، فتش بين أصابع كرعينك أول.
المرة الجاية حنمشي لموضوع غريب جداً:
حنتكلم عن "بقاقات السكري"، وكيف إنو العروق الدقيقة لما تتعب بتخلي الجلد يفك براهو من غير أي ألم ولا التهاب.
#عيادات_بيت_العافية
#عيادة_الجلدية_أون_لاين