تخيل تصحى من النوم وتعاين لكراعك أو أصابعك، وتلقى فجأة بقاقة كبيرة ومشدودة ومليانة موية، لكن الغريب إنها ما بتوجعك نهائي ومافي أي حمار أو التهاب حوالينها.
الحالة دي بتظهر حصرياً عند مرضى السكري، وتحديداً الناس العندهم سكري مزمن ومضاعفات قديمة زي التهاب الأعصاب أو مشاكل في العيون والكلى، الحالة دي طبياً بنسميها "بقاقات السكري" أو (Bullosis Diabeticorum).
عشان نفهم الحاصل، نرجع لقصة "الحيطة والمونة" حقتنا، طبقة الجلد الخارجية مربوطة بالطبقة التحتها بـ "مسامير" وخيوط دقيقة جداً في الغشاء القاعدي، في مريض السكري، السكر العالي لفترات طويلة بيعمل عملية "تسكير" للبروتينات دي، وده بيخلي الخيوط والمسامير دي تتغير وتضعف
بالإضافة لكده، العروق الدموية الدقيقة اللي بتغذي الجلد بتنسد وتتعب، النتيجة إنو "المونة" دي بتفقد قوتها، والجلد بيبقى هش جداً، وعتبة تحملو بتقل شديد، لدرجة إنو ممكن يفك براهو ويعمل البقاقة دي من غير أي سبب ظاهر.
الخلعة بتجي لما المريض يفتكر إنو دي بداية "قدم سكري" بكتيري أو مرض مناعي خطير محتاج كورتيزون، لكن الفحص تحت المايكروسكوب بيطمنا إنو مافي أي خلايا التهابية أو أجسام مضادة زي البتحصل في الأمراض المناعية
دي ببساطة عبارة عن "هبوط هندسي" في سقف الجلد بسبب السكري. علاجها بيعتمد أساساً على ضبط السكر والعناية الموضعية البسيطة عشان البقاقة دي ما تطق وتلتهب وتجيب لينا بكتيريا من بره.
المرة الجاية حنتكلم عن "بقاقات التورم"، وكيف إنو لما الموية تزيد عن حدها، بتضغط على الجلد وتعمل بقاقات.
#عيادات_بيت_العافية
#عيادة_الجلدية_أون_لاين