================================
تعديل وتنبيه مهم للغاية:
ما مقصود من السلسلة التشجيع على التداوي الذاتي، بل فهم المسببات والخيارات العلاجية وأهمية التقييم وضرورة وضع خطة مناسبة بتتجاوز الادوية لمخاطبة جذور المشكلة كلها حسب الشخص المحدد، فدي ما رخصة للتجربة بل توعية بالخيارات ولازم تكون تحت إشراف طبي بعد التقييم المناسب
================================
نجي للمهم، كيف ممكن نعالج الكلف بعلم حقيقي ونطلع من دوامة "كريمات السوق" اللي دمرت وشوش كتيرة، والأساس هنا إننا نغير عقلياتنا من فكرة "التبييض" العنيف لـ "السيطرة والتحكم البيولوجي" عشان ما نأذي البشرة السمراء الحساسة.
القاعدة الذهبية في التعامل مع نوع بشرتنا (FST IV-VI) هي إننا نمنع إنتاج الصبغة من غير ما نهيج الجلد، لأن أي تهيج أو "حريق" حيتحول طوالي لـ (PIH) أو تصبغات ما بعد الالتهاب، وكأننا ما عملنا حاجة.
أول سلاح بنستخدمه هو "العلاج المركب" أو الخلطة الثلاثية (TCC) اللي بتتكون من هيدروكينون 4% مع تريتينوين 0.05% وكورتيزون خفيف (فلوسينولون) 0.01%. العلم وراء الخلطة دي إن الهيدروكينون بيوقف مصنع الصبغة ، والتريتينوين بيسرع تجديد الخلايا عشان تطلع الصبغة القديمة ويساعد الكريم إنه يدخل لعمق أكبر ، أما الكورتيزون فوظيفته يمنع الالتهاب الناتج عن المادتين التانيات ويقلل نشاط الخلايا. البروتوكول الصح إنها تستخدم بالليل لمدة 8 أسابيع بس، لأن استخدامها لفترات طويلة (أكتر من 6 شهور) بيعرض الوش لترقق الجلد وظهور عروق دموية مزعجة.
بالنسبة للهيدروكينون (HQ) براه، ده لسه بيعتبر "المعيار الذهبي" في العلاج، بس في بشرتنا لازم نستخدم تركيز بين 2% لـ 4% وما نزيد عنه أبداً. وكمان لازم نستخدمه مرة واحدة بالليل ولمدة ما تزيد عن 3 أو 4 شهور متواصلة، وبعدها لازم نوقفه ونبدله بمواد تانية (Rotation) عشان ما نرهق خلايا الصبغة وعشان نتفادى الكارثة اللي اسمها "الأوكرونوزيس" اللي بتخلي الوش يزرق.
الطريقتين الفوق عندهم مشاكل بتاعت تهيج أحيانا وكمان ممكن يعملوا هالة بياض حول الكلف لأنو ما بميزوا بين الكلف والجلد السليم فلازم يكونوا تحت إشراف طبي دقيق وما بالعشوائية الحالية الحاصلة (الميلانو فري هو الخلطة الثلاثية والهاي كوين هو الهايدروكوينون وسوء إستخدامهما بدون إشراف طبي دوما بزيد المشكلة او يخليها ترجع بسهولة)
أما بالنسبة للجلوتاثيون، فلازم نحذر بشدة من "الحقن الوريدية"، لأنها غير آمنة وما عندها دراسات كافية وممكن تسبب فشل كلوي أو مشاكل في الغدة الدرقية. لو في رغبة بالجلوتاثيون، الأفضل الأشكال اللي بتتاخد تحت اللسان أو الليبوزومال بجرعة 500 ملجم.
وفي العيادة، ممكن نستخدم "التقشير الكيميائي السطحي" فقط، زي حمض الجليكوليك أو الساليسيليك، عشان نشيل الصبغة الفوق، بس لازم "تحضير" الوش بمثبطات الصبغة لمدة أسبوعين لـ 4 أسابيع قبل التقشير عشان ما يقلب بنتيجة عكسية ويعمل تصبغات ما بعد الالتهاب.
وعشان نتجنب المشاكل دي كلها في بدائل حديثة كويسة وفعاليتها لا تقل عن الفات، نتكلم عنهم بالمنشور الجاي
#عافية_التصبغات
#عيادات_بيت_العافية
#عيادة_الجلدية_أون_لاين