بدءا الحكاية بتجي من جوّة، أكبر عدو لعيوننا هو "الأنيميا" أو فقر الدم، ودي منتشرة عندنا بالذات عند الحوامل وبتأثر على أغلب البنات. لما الحديد ينقص، البشرة بتبقى شاحبة شديد، فبتقوم تظهر الأوعية الدموية الداكنة التحت الجلد الرقيق ده بصورة أوضح، وده اللي بيدي اللون الأزرق أو البنفسجي.
كمان لازم نفتش ورا "الغدة الدرقية" (TSH)؛ لأن الخمول فيها بيعمل انتفاخ (Edema) وجفاف في الجلد، وده بيخلي منطقة العين تبدو غائرة ومسودة.
في سبب تاني مهم جداً وبنلقاه كتير في حالات تكيس المبايض (PCOS)، وهو "الشواك الأسود" (Acanthosis Nigricans). وبكون ملمسه مخملي وبيظهر في الرقبة وأحياناً بوضوح في "الوش والعيون". ظهوره في الوش معناه في "مقاومة أنسولين"، وعشان كدة بنطلب فحوصات سكر الصيام (Fasting Insulin/Glucose)؛ لأن العلاج هنا ما كريمات تفتيح بس، بل هو تنظيم الأنسولين وتنزيل الوزن.
وللأسف، الرغبة في التفتيح السريع بتوقعنا في "فخ الكريمات المجهولة". الخلطات اللي فيها "زئبق" أو "كورتيزول" بتركيزات عالية، أو الفيها "هيدروكينون" أكتر من 4%، وده بعمل كارثة بنسميها "الأوكرونوز" (Exogenous Ochronosis). الآلية هنا مرعبة؛ المادة الكيميائية مع الشمس بتعمل "تصبغ عكسي" عميق بكون لونه أزرق مسود أو رمادي كأنه "حبر" تحت الجلد، وده للأسف من أصعب الحاجات في العلاج وممكن يكون دائم. الكورتيزول بالذات بعمل "ترقق" في الجلد، فبتبقى العروق ظاهرة أكتر (هالات وعائية) وبتدخل العيون في دوامة سواد ما ليها نهاية.
برضو طقس "الدخان" السوداني، ورغم جماله الثقافي، إلا إن دخان خشب الطلح فيه مواد كيميائية بتعمل تهيج شديد للعين (Airborne Contact Dermatitis). الالتهاب ده بيخلينا "نهرش" المنطقة، والهرش المستمر بيحفز الخلايا الصبغية، وده اللي بنسميه "تصبغ احتكاكي". حتى الحساسية الموسمية أو "الجيوب الأنفية" بتعمل احتقان في الأوردة حول العين (Allergic Shiners)، وبخلي الهالات الوعائية تظهر بوضوح.
مع المسببات الكتيرة دي وعشان نعالج صاح، لازم نفكك الخيوط دي خيط خيط ونصيغ الخطط على أساس من الفهم، وده اللي حنعرفه في البوست الجاي عن "خطة الإنقاذ".
#عيادات_بيت_العافية
#عيادة_الجلدية_أون_لاين