ختاماً لرحلتنا مع علاج فقر الدم، لازم نتكلم عن "فنيات" صغيرة في روتين حياتنا اليومية ممكن تكون هي الشعرة الفاصلة بين نجاح العلاج وفشله
الحديد ده عنصر "مزاجي" جداً وحساس كيميائياً، وعملية امتصاصه في الأمعاء الدقيقة معقدة وبتتأثر بشدة بنوع الأكل والمشروبات المصاحبة ليهو، وعشان كدة دائماً بنقول للمرضى إنو الـ Ascorbic Acid أو فيتامين سي هو "الصديق الصدوق" للحديد، لأنو بيخلق وسط حمضي مثالي بيحول الحديد للصيغة القابلة للامتصاص
فلو عودت نفسك تبلع حبة الحديد مع كباية عصير برتقال أو ليمون فريش، أو حتى مع حبة فيتامين سي فوارة، إنت كدة بتكون حرفياً دبلت الفائدة وساعدت جسمك يستفيد من كل مليجرام.
في المقابل، بنلقى إنو "العدو الأول" للامتصاص هو للأسف واحد من أهم طقوسنا السودانية الراسخة، وهو كباية الشاي "المنعنع" أو القهوة المظبوطة بعد الأكل مباشرة، لأنو المشروبات دي غنية بمركبات الـ Tannins و الـ Polyphenols اللي بتشتغل زي "المغناطيس" وتكلبش في جزيئات الحديد وتمنع امتصاصها
ونفس الكلام ده بينطبق بدقة على الكالسيوم الموجود في الحليب والزبادي، وعشان نحل المعضلة دي من غير ما نحرم نفسنا، لازم نطبق "قانون الساعتين"، يعني لازم نفصل زمنياً بين حبة الحديد وبين الشاي والقهوة ومنتجات الألبان بفاصل ساعتين على الأقل، سواء قبل الجرعة أو بعدها، عشان ندي "بوابات الامتصاص" فرصتها الكاملة من غير مزاحمة.
أما بخصوص أفضل وقت للجرعة، فالمعيار الذهبي بيقول إنو المعدة الفاضية هي الوضع الأمثل للامتصاص، لكن الواقع العملي بيقول إنو ده ممكن يكون قاسي جداً على معدة البعض وممكن يسببقلبة بطن Gastric Upset شديد، فلو حصل ليك كدة، ما توقف العلاج، لكن ببساطة خت الحبة وسط وجبة خفيفة ما فيها حليب أو بيض، لأنو استمرارك في العلاج (Adherence) أهم بكتير من الامتصاص المثالي
وآخر وأهم رسالة نختم بيها هي إنو الأنيميا دي "عَرَض" وليست "مرض" قائم بذاته، يعني هي جرس إنذار بيقول ليك في خلل ما، فما ينفع نكتفي بملء "الجردل" بحبوب الحديد ونحن ما سدينا "القد" اللي بيسربو، فلازم بمساعدة طبيبك تفتش بجدية عن الأسباب الخفية Underlying Cause، هل هو نزيف دورة شهرية غزير Menorrhagia، ولا قرحة معدة صامتة، ولا مشاكل سوء امتصاص زي الـ Celiac Disease، لأنو علاج السبب الجذري هو الضمان الوحيد إنو الصحة ترجع والحديد ما ينقص تاني
نتمنى ليكم دوام العافية ودمتم سالمين.
#عيادات_بيت_العافية
#عيادة_الجلدية_أون_لاين