كتيبة الإسناد من قلب الطبيعة
بعد ما اتكلمنا في البوست الفات عن "الثوم" وعرفنا إنه "قلب الهجوم" اللي بيحرق الطفيلي، أسي حنتكلم عن "خط الدفاع" و"الإسناد"، لأنو المعركة مع اللشمانيا في ظروف الحرب والنزوح ما بس قتل الطفيلي، لكن كمان حماية الجرح من الالتهاب، وتنشيف "النزيز"، وتنظيف المكان عشان يلتئم، وهنا بتفتح لينا "صيدلية القرية" أبوابها بتلاتة من أبطالنا المحليين: القرض، والنيم، واللالوب.
نبدأ بـ "المثبت العظيم": القرض (Acacia nilotica).
القرض ده هو الحل السحري للقرحات "الرطبة" المفتوحة اللي بتنز موية ودم، والسبب العلمي إنو القرض مليان مواد قابضة بنسميها "العفص" (Tannins). المواد دي لما تختها على الجرح بتشتغل زي عملية "الدباغة" بالضبط؛ بترسب البروتينات وتقفل العروق الصغيرة، فبتوقف النزيف والنزيز فوراً، وبتعمل طبقة حماية (قشرة) تمنع البكتيريا من الدخول. القرض كمان ممتاز كـ "ضمادة" بعد ما نخلص علاج الثوم والجرح يكون لسه مفتوح.
وعشان تستفيد منه صح، أحسن طريقة هي عمل "مرهم القرض" في البيت بدل ما ترشه كبودرة بس:
• جيب قرون القرض الناشفة ودقها ناعم شديد وغربلها عشان تشيل القشور القاسية.
• سخن ليك شوية "زيت سمسم" في النار (ما تخليه يغلي ويدخن، بس يسخن).
• ضيف بودرة القرض للزيت (بنسبة ملعقة بودرة لـ 9 ملاعق زيت تقريباً) وحركهم ربع ساعة في نار هادية.
• خليه يبرد واستعمله دهان للجروح المفتوحة مرة أو مرتين في اليوم.
• (تنبيه صغير: القرض بيصبغ الجلد والجرح بلون أسود أو بني غامق، ده طبيعي جداً وما وسخ ولا عفونة، دي المادة الفعالة شغالة شغلها) .
نجي لـ "الحارس الأمين": النيم (Azadirachta indica).
النيم في السودان مستعمل بكثرة (وإن كانت مرات غلط) لسبب وجيه، لأنو "مطهر شامل". لو الجرح "ملتهب" وفيه صديد وريحة عفنة، أو "حار" ومحمر، هنا الثوم ما بينفع، والقرض ما بياخد راحته.
هنا بجي دور النيم. مغلي أوراق النيم بيشتغل كغسول معقم قوي جداً بيقتل البكتيريا وينظف الجرح. وغير كدا، النيم عندو ميزة إضافية خرافية: ريحته ومكوناته (مادة Azadirachtin) بتشتغل كـ "طارد للحشرات"، يعني بتمنع ذبابة الرمل إنها تقرب من المريض وتلدغه تاني.
طريقة الاستعمال بسيطة:
• للغسيل والتعقيم: اغلي أوراق النيم النظيفة في موية لحدي ما لون الموية يبقى أخضر غامق، صفيها وخليها تبرد، واستخدمها لغسيل الجروح يومياً بدل الموية العادية.
• للحماية: ممكن تمسح زيت النيم (أو زيت نباتي طبخت فيهو أوراق نيم) على الأجزاء المكشوفة من الجسم بالليل عشان تطرد الذبابة.
أخيراً، "الصابون الطبيعي": اللالوب (Balanites aegyptiaca)
في وقت الحرب، الصابون ممكن ينعدم أو يغلى، والنظافة هي نص العلاج. ثمرة اللالوب (الهجليج) القشرة واللحم حقها مليانين مادة اسمها "صابونين" (Saponins). لو بليت اللالوب في موية ورجيته بيعمل رغوة زي الصابون بالضبط، الرغوة دي ممتازة جداً لغسيل الجلد حول القرحة وتنظيفها بلطف من غير كيماويات. وكمان نواة اللالوب (الجمجمة) فيها زيت سمح شديد ممكن يساعد في طراوة الجلد مكان الندبة بعدين.
دي كانت أسلحتنا من الطبيعة: الثوم (للهجوم)، القرض (للتنشيف والتثبيت)، النيم (للتعقيم والحماية)، واللالوب (للنظافة). الحاجات دي متوفرة ورخيصة، وممكن تكون طوق نجاة لمن انقطعت بهم السبل.
في البوست الجاي حنلخص العلاجات البلدية والتحذيرات حولها وما تستعمل بتين، ثم أخيرا، حنختم السلسلة بأهم خطوة: كيف نمنع الذبابة مننا أصلاً؟ وكيف نحمي أطفالنا بأبسط الإمكانيات؟
حفظكم الله وشفاكم.
#عيادة_الجلدية_أون_لاين #عيادات_بيت_العافية