كيف تفك كود بشرتك وتفصل ليها المرطب الصاح؟
خلونا نتفق على حقيقة طبية مهمة شديد، وهي إنه مافي حاجة اسمها "أفضل مرطب في العالم" أو "الكريم السحري"، دي كذبة تسويقية كبيرة لأن الكريم البيكون مفيد لشخص ممكن يكون مضر لشخص تاني، والسر كله بيكمن في إنك تعرف "الكود" الخاص ببشرتك إنت
وعشان كدا أطباء الجلدية بيستخدموا نظام تصنيف دقيق اسمه "نظام باومان" بيحلل البشرة بناءً على أربعة أبعاد أو صفات، والنتيجة بتكون "شيفرة" بتوريك بالضبط إنت محتاج ياتو نوع من "التحيز" في كريمك.
أول بعد في الشيفرة دي هو "الدهنية مقابل الجفاف"، وده الأساس اللي بيحدد قوام الكريم؛ فلو بشرتك بتفرز زيوت كتير ومسامها واسعة، إنت هنا في خانة دهون (Oily) وبتحتاج مرطبات "مائية" خفيفة زي الجل أو اللوشن اللي بتعتمد على "الشفاطات" (Humectants) زي الجلسرين والهيالورونيك من غير ما تقفل المسام بدهون تقيلة، أما لو بشرتك ناشفة ومشدودة، فإنت في خانة نشاف (Dry) ومحتاج "دهون" تعويضية (Lipids) ومواد قافلة (Occlusives) زي زبدة الشيا أو الفازلين عشان تمسك الموية وتعوض المونة الناقصة.
البعد التاني والمهم جداً لينا هو "الحساسية مقابل المقاومة"، فالبشرة الحساسة (Sensitive) هي اللي حاجزها ضعيف وبتحمر وتتهيج من أقل حاجة، ودي "تحيز" المرطب حقها لازم يكون مرمم للبشرة (Barrier Repair) يعني مليان سيراميد ومهدئات وخالي تماماً من العطور والمواد الحارة، عكس البشرة القوية (Resistant) أو "الجلد التخين" اللي حائط الصد فيها قوي وممكن تستحمل مرطبات فيها مواد فعالة قوية ومقشرات من غير مشاكل.
نجي للبعد الثالث وده بيخصنا شديد كسودانيين، وهو "القابلية للتصبغ"، فالبشرة دي (Pigmented) هي اللي أي جرح أو حبة فيها بتقلب بقعة داكنة بسرعة، ودي بتحتاج مرطبات ذكية فيها مواد بتمنع التصبغ زي "النياسينامايد" أو "فيتامين سي" عشان تضرب عصفورين بحجر (ترطيب وتوحيد لون) وفي نفس الوقت لازم نبعد فيها عن أي مرطب بيعمل تهيج لأنه حيزيد السواد، أما البشرة الهادئة (Non-pigmented) فدي نادرة عندنا وهي اللي ما بتشيل أثر و بتتقبل حاجات قوية (إذا ما كانت حساسة).
وآخر بعد في الشيفرة هو "المرونة مقابل التجاعيد"، فلو بشرتك قابلة للتجاعيد (Wrinkle-prone) وبدأت تظهر فيها خطوط، المرطب حقك لازم يكون فيهو "محاربات زمن" ومضادات أكسدة، بينما البشرة (Tight) المشدودة بتحتاج بس المحافظة على الترطيب عشان تفضل شابة.
عشان كدا، لما تجي تختار مرطب، خت الكود حقك قدامك؛ يعني مثلاً لو إنت "جاف وحساس وقابل للتصبغ"، إياك تستخدم كريمات تفتيح قوية أو مقشرات حارة لأنها حتدمرك، إنت محتاج مرطب "مرمم للحاجز" فيهو دهون وسيراميد ومواد تفتيح هادئة، ولو إنت "دهني ومقاوم"، ممكن تستخدم مرطبات خفيفة فيها مقشرات عشان تضبط الدهون وتدي نضارة، وبالطريقة دي إنت بتفصل الروشتة على مقاسك بالظبط بدل ما تجرب وتضيع قروشك.
بالمنشور الجاي حنعرف العوامل التانية اللي بتحكم الترطيب المناسب حسب مناطق الجسم المختلفة والمناخ الحولك
#عيادة_الجلدية_أون_لاين
#عيادات_بيت_العافية
#أسرار_الترطيب