اعرف تتعامل مع كل منطقة كيف
من أكبر الغلطات اللي بنقع فيها إننا بنفتكر الجلد ده "قماشة واحدة" وبنعامل الجسم كله بنفس الكريم، لكن الحقيقة إن جسمك عبارة عن خريطة تضاريس مختلفة، وكل منطقة عندها "مناخ" وحوجة خاصة بيها تماماً.
لو بدينا بالوجه، حنلقى إن منطقة الـ T-Zone (الجبهة والأنف) مليانة غدد دهنية بتفرز زيوت طبيعية، وعشان كدا المنطقة دي غالباً ما بتحتاج كريمات تقيلة إلا في حالات الجفاف الشديد، لأنها بترطب نفسها بنفسها.
لكن لو نزلنا تحت للساقين، وبالذات منطقة "الساقين " (Shins)، حنلقى الوضع مختلف تماماً؛ المنطقة دي فقيرة جداً بالغدد الدهنية والدورة الدموية فيها أضعف، وعشان كدا هي أول مكان بيجف وبيظهر فيه "جلد التمساح" أو التشققات (Asteatotic Eczema)، ودي ما بينفع معاها لوشن خفيف، دي محتاجة دهون تقيلة ومواد منعمة (Emollients) تعوض النقص الشديد.
ولو مشينا لمناطق زي الكعبين وباطن اليدين، حنلقى الجلد هناك سميك جداً ومبني طبقات فوق بعض عشان يتحمل الضغط. في المناطق دي، المرطب العادي بيفشل لأنه ما بيقدر يخترق السماكة دي، والحل الوحيد هنا هو استخدام كريمات فيها مادة "اليوريا" بتركيز عالي (أكثر من ١٠٪)، لأن اليوريا بالتركيز ده بتشتغل شغلين: بترطب، وفي نفس الوقت بتذوب الروابط بين خلايا الجلد الميتة (Keratolytic) وتكسر القشرة القاسية.
واللعبة بتتعقد أكتر لما ندخل عامل الطقس، أو ما يسميه العلماء "مفارقة المناخ"؛ فمثلاً ناسنا في الخليج عايشين في "مكيفات" بتنزل رطوبة الجو لأقل من ٣٠٪، وده بيشفط الموية من الجلد شفط. في الحالة دي، لازم تستخدم مرطبات فيها شفاطات رطوبة عاليه زي "الجلسرين" عشان تمسك الموية، بس لازم فوقها طبقة عازلة قوية تمنع التبخر.
أما في سخانة السودان، الوضع مختلف؛ لو استخدمت فازلين تقيل وطلعت الشارع، حتعمل حاجة اسمها "تأثير الصوبة الزجاجية" (Greenhouse Effect)، يعني الكريم حيحبس الحرارة والعرق جوه ويخليك تزهج وتسخن. الأفضل هنا استخدام مرطبات خفيفة أو فيها "دايماثيكون" (Dimethicone) لأنه مادة بتعمل طبقة حماية بس في نفس الوقت "بتتنفس" وبتسمح بمرور بخار الماء وما بتكتم الحرارة.
أخيراً، في حالات مرضية خاصة بتغير قواعد اللعبة تماماً؛ زي "الأكزيما"، اللي مشكلتها الأساسية إن "المونة" أو الدهون بين الخلايا ناقصة، وبالذات السيراميد، وعلاجها لازم يكون بكريمات فيها سيراميدات لترميم الحاجز.
وزي الناس البياخدوا حبوب "الروكوتان" (Isotretinoin)، الدواء ده بينشف الغدد الدهنية تماماً، فلازم نعاملهم معاملة الجفاف الشديد بمرطبات قوية وقافلة زي الفازلين للشفايف. وحتى حالات الجلد الخشن والمتحزز الناتج عن الحك المستمر (Lichenification)، ده علاجه بكسر حلقة "الحكة والهرش" عن طريق الترطيب المكثف واليوريا لترجيع نعومة الجلد.
بالمنشورات الجاية حنعرف شنو هي العادات الجيدة والسيئة بمجتمعنا السوداني قبال نصل لأهم جزء بتاع تحليل منتجات الترطيب المختلفة ومناسبتها للمشاكل المختلفة
#عيادة_الجلدية_أون_لاين
#عيادات_بيت_العافية
#أسرار_الترطيب