نواصل حكايتنا مع التسلخات واليوم حنتكلم عن "المتهم الأول" والنوع الأكثر شيوعاً اللي بنسميهو علمياً "التهاب الجلد التهيجي Irritant Contact Dermatitis "، وده النوع الكلاسيكي اللي بتعرفو كل الامهات وبكون عبارة عن رد فعل طبيعي للجلد لما يتعرض لظروف قاسية
العلامة المميزة جداً للنوع ده واللي عايزكم تحفظوها صم هي شكل الجلد، بيكون لونه أحمر "زي النار" وفيهو لمعة كأنو مدهون ورنيش، والاحمرار ده دائماً بيتركز في المناطق البارزة من جسم الطفل زي "الأرداف" والمنطقة التناسلية وأعلى الفخذين من جوه ، يعني الأماكن اللي الحفاض "بيلصق" فيها وبيحكها مباشرة.
عشان تفرقوا بين النوع ده وبين الانواع التانية الخطيرة اللي حنتكلم عنها المرات الجاية، لازم تعاينوا كويس لـ "تنيات الجلد" الموجودة بين الفخذ والبطن، في النوع ده التنيه دي بتكون "سليمة وبيضاء" وما فيها أي احمرار
والسبب بسيط ومنطقي جداً، إنو المناطق الغريقة دي "متدسية" ومحمية من الاحتكاك المباشر مع الحفاض ومع "الخلطة الحارقة" حقت البول والبراز ، فبتلقى الاحمرار راسم خط واضح بيقيف عند بداية التنية بالضبط.
التحسس ده غالباً بحصل لما الطفل يكون عنده إسهال، لأنو الإسهال بيخلي البراز يطلع معاهو "عصارة صفراوية" وانزيمات هاضمة حارقة جداً ، ولما نزيد عليها الحركة والاحتكاك مع الحفاض، الجلد بيتهري وبتظهر فيهو قروح صغيرة
كمان الحكاية دي بتزيد مع بداية أكل الطعام الصلب لأنو طبيعة اخراج الطفل بتتغير وبتبقى حامضية وقوية على الجلد ، وعلاج الحالة دي بيعتمد بشكل أساسي على إننا نوقف الاحتكاك ده ونعزل الجلد عن الرطوبة
يعني الموضوع هنا "ميكانيكي" بحت، جلد متهيج محتاج راحة وحماية من غير تعقيدات، لكن لو الاحمرار ده دخل جوه التنيات وبقى شكله مختلف، هنا الكلام بيتغير وده اللي حنعرفه في البوست الجاي.
#عيادات_بيت_العافية #عيادة_الجلدية_أون_لاين