ده هو الجزء الأهم والأكثر فاعلية في القضاء على مشكلة الخراجات المتكررة. في المرات الفاتت اتكلمنا عن التعامل مع "الخراجة" كحبة ظاهرة، لكن الليلة حنتكلم عن علاج "الحالة" نفسها. الفرق هنا زي الفرق بين إنك تكتل ليك نملة ماشة في الحيطة، وبين إنك تمشي تفتش جحر النمل وتقضي عليه من أساسه. الهدف من الخطة دي هو تقليل عدد البكتيريا العايشة على جسمك لمستوى بسيط ما يقدر يعمل ليك التهاب.
العملية دي بنسميها طبياً "إزالة الاستعمار البكتيري" (Decolonization)، وعادة بنبدأ فيها بعد ما الخراجة الحالية تهدأ وتخف. الخطة دي بتعتمد على هجوم متزامن في جبهتين: الأنف والجلد.
بالنسبة للجبهة الأولى وهي "الأنف"، السلاح الأساسي هو مرهم اسمه "موبيروسين 2%" (Mupirocin). الطريقة الصحيحة لاستخدامه هي إنك تاخد كمية صغيرة قدر "رأس عود الكبريت" وتدخلها جوة فتحات الأنف الاتنين، مرتين في اليوم لمدة 5 لـ 7 أيام. والأهم من دة كله، بعد ما تخت المرهم، لازم تضغط على أنفك وتفركه (مساج) لمدة 15 ثانية عشان تضمن إن المرهم اتوزع في كل الزوايا الداخلية وقتل البكتيريا المتدسية.
الجبهة التانية هي "الجلد"، وهنا بنستعمل غسول للجسم بيحتوي على مادة الكلورهيكسيدين" (Chlorhexidine) بتركيز 2% أو 4%. بنستخدمه زي الصابون للاستحمام اليومي لمدة 5 لـ 7 أيام بالتزامن مع فترة علاج الأنف. النقطة الفاصلة في نجاح الغسول دة هي "الصبر"؛ لازم تخليه على جسمك لمدة دقيقتين لـ 3 دقائق قبل ما تشطفه بالموية، عشان تديه فرصة يقتل البكتيريا. ركز بالذات على المناطق اللي بتحبها البكتيريا زي الإبطين وبين الفخذين وتحت الصدر. وبالنسبة لشعر الرأس، ممكن تغسله بنفس الغسول دة في اليوم الأول والتالت والخامس عشان نضمن نظافة فروة الرأس كمان.
في بديل اقتصادي وفعال جداً للناس الما بتقدر تستخدم الكلورهيكسيدين أو بتتحسس منه، وهو "حمامات الكلور المخفف" (Bleach Baths). الوصفة بسيطة: بتضيف حوالي نص كوباية (120 مل) من الكلور المنزلي العادي (بدون روايح أو إضافات) لبانيو مليان موية دافية، وتنقع جسمك فيه لمدة 10 لـ 15 دقيقة. الطريقة دي آمنة لو اتعملت بالنسب الصحيحة وبتقتل البكتيريا من غير ما تخليها تقاوم العلاج.
الشرط الأساسي لنجاح العملية دي هو "شمولية العلاج". أكبر غلطة بنقع فيها إننا نعالج المريض وننسى الناس العايشين معاه. الدراسات أثبتت إن البكتيريا دي بتدور بين أفراد البيت (Ping-pong effect)، عشان كدة التوصية القوية بتقول إنو "ناس البيت كلهم" لازم يعملوا بروتوكول التنظيف دة (مرهم الأنف وغسول الجسم) في نفس الأيام مع بعض، حتى لو ما عندهم أي خراجات ظاهرة. تطبيق النظام دة بشكل جماعي بيقلل نسبة رجوع المرض بشكل كبير جداً.
أحياناً، وبعد فترة، ممكن البكتيريا تحاول ترجع تاني. في الحالة دي، ممكن نحتاج نعيد الكورس ده (يسموه Pulse therapy) بداية كل شهر، أو نستخدم حمامات الكلور مرتين في الأسبوع كروتين وقاية دائم.
كدة نكون نظفنا الجسم من برة. لكن، في حالات نادرة وعنيدة جداً، التنظيف الخارجي براهو ما بيكفي، وبنحتاج نتدخل بأدوية قوية عن طريق الفم. ده حيكون موضوعنا في البوست الجاي عن "علاج الحالات المستعصية".
#عيادات_بيت_العافية #عيادة_الجلدية_أون_لاين #الخراجات_المتكررة
الفهرس
https://www.facebook.com/share/p/1KNW9nQWXK/