الحنة السودة البتدي لون غامق بسرعة مرات ما بتكون حنة نباتية براها، في خلطات كثيرة بيضاف ليها بارافينيلين ديامين (Para-phenylenediamine)، واختصارو (PPD)، عشان اللون يبقى أسود وأسرع وأثبت، المادة دي معروفة كواحدة من المواد القوية في إحداث حساسية الجلد التلامسية، ودي حكاية مختلفة من لون الحنة ذاته
الطفل الممكن يتعمل ليهو نقش حنة سودا ويطلع بعد أيام بحكة، وفقاعات، وإفرازات، وتورم في مكان الرسم، ممكن يكون دخل في التهاب جلد تماسي تحسسي (Allergic contact dermatitis)، المشكلة ما بتنتهي دائما مع اختفاء الطفح، لأن التحسس من (PPD) ممكن يفضل، وبعد سنوات أول صبغة شعر فيها نفس المادة تعمل رد فعل أشد، تقارير أطفال بعد الحنة السودا وثقت استمرار مناطق فقدان لون بعد الالتهاب، وبرضو وثقت إن الطفل ممكن يتحسس من تعرض سابق ما عمل أعراض واضحة وقتها
السودان عندو فصل أخطر في حكاية (PPD)، لازم نفرق بين الحساسية الجلدية والتسمم الجهازي، دراسة من الخرطوم على واحد وتلاتين ٣١ طفل دخلوا المستشفى بين ١٩٨٤ و١٩٨٩ بعد التعرض لخليط صبغة الحنة وبارافينيلين ديامين لقت تورم وعائي شديد عند كل الأطفال، وخمستاشر ١٥ احتاجوا فتح مجرى هوائي جراحيا، وخمسة حصل ليهم فشل كلوي حاد، وتلاتاشر توفوا، أغلب الحالات كان فيها ابتلاع متعمد أو عرضي، وفي ست حالات رجح الباحثون الامتصاص عن طريق الجلد، يعني الأرقام دي بيانات تسمم شديد، وما وصف لرد الفعل المتوقع من كل نقش حنة على الجلد
وفي نقطة مهمة شديد عند الأطفال المصابين بنقص إنزيم جلوكوز ستة فوسفات ديهيدروجيناز (G6PD)، الخطر هنا ما مربوط بـ (PPD) براهو، لأنو في تقارير عن أطفال ومواليد حصل ليهم تكسيرشديد بالدم بعد مسح الحنة الطبيعية نفسها على الجلد، ومن ضمن الحالات طفل توفى رغم نقل الدم، عشان كده ما بنقدر نقول إن إزالة الصبغة السوداء من الحنة خلتها آمنة تلقائيا لكل طفل، خاصة المولود أو الطفل المعروف عندو نقص الإنزيم
الحنة الطبيعية عادة بتدي لون برتقالي مائل للبني وبتطور مع الزمن، بينما اللون الأسود السريع والثابت بشدة بخلينا نشك في إضافات صبغية زي (PPD)، الاشتباه هنا كفاية عشان ما نجرب الخليط على طفل، لأننا ما عندنا طريقة نعرف التركيز الحقيقي من لون المعجون أو كلام البائع
لو الطفل بعد الحنة حصل ليهو تورم في الوش أو الشفايف، صعوبة تنفس، خمول شديد، بول غامق، اصفرار، أو تدهور سريع، دي ما قصة كريم حساسية في البيت وبتحتاج تقييم طوارئ مباشر، وفي البوست الجاي حنوسع العدسة من الحنة للكي وبقية الممارسات التقليدية، ونشوف متين الموروث ممكن يكون عندو فائدة ومتین التأخير بسببو ممكن يكون مضر جدا