لمن الطفل يدخل المراهقة، المرآة بتبقى جزء مهم من يومو، والحبة الصغيرة في الوش ممكن تأثر على ثقتو في نفسو أكتر مما الكبار متخيلين، حب الشباب (acne vulgaris) شائع جداً في العمر ده، وفي البشرة الداكنة الحكاية بتستمر بعد ما الحبة تهدأ، لأنو الأثر الغامق ممكن يقعد شهور
الأثر ده بنسميهو التصبغ بعد الالتهاب (post-inflammatory hyperpigmentation)، أو اختصاراً (PIH)، الحبة ممكن تعيش أيام أو أسابيع، لكن البقعة البعدها ممكن تفضل شهور، وأحياناً أطول، عشان كده المراهقين بنزعجوا من الآثار أكتر من الحبوب النشطة ذاتها
التصبغ ما وسخ، وما معناه انو في حبة مدفونة تحت الجلد، الالتهاب بنشط الخلايا الصبغية، وبعد ما الحبة تخف بفضل الميلانين الزائد في مكانها، في بشرتنا الأثر بكون أوضح، وأبطأ في الاختفاء، أحسن طريقة لعلاج الآثار هي تقليل الحبوب الجديدة والالتهاب من البداية، الانتظار لحدي ما الوش يتمي بالبقع، غالباً بطوّل الطريق وبدخل المراهق في تجارب وخلطات ممكن تهيج الجلد أكتر
الريتينويدات الموضعية (topical retinoids)، زي أدابالين (adapalene) وتريتينوين (tretinoin)، من العلاجات المهمة لأنها بتمنع انسداد المسام وتقلل الحبوب الجديدة، وبرضو بتساعد التصبغ يتحسن بالتدريج، غير انو الاستعمال العنيف ليها ممكن يعمل جفاف ولسعة وتقشر، والتهيج ذاتو ممكن يسيب لون أغمق
عشان كده العلاج بنبدأو بالتدريج، بكمية صغيرة للوش كلو، ومع مرطب لطيف، حسب الخطة الطبية، الزيادة في كمية الكريم ما بتسرع النتيجة، وإنما بتزيد احتمال التهيج، وتفاصيل علاج حب الشباب وأنواعو وأدويتو اتكلمنا عنها بصورة موسعة في سلسلة حب الشباب، وهنا المهم نفهم خصوصية المراهقة والبشرة الداكنة
واقي الشمس مهم برضو، لأنو التعرض للشمس بخلي الآثار أغمق وأبطأ في الاختفاء، الواقي الملون الفيهو أكاسيد الحديد (iron oxides) ممكن يفيد في تقليل زيادة التصبغ، خصوصاً مع التعرض للضوء الظاهر
العصر والدعك وفتح الحبوب بالإبرة من أسرع الطرق لصناعة أثر طويل، المراهق البقعد قدام المرآة كل يوم يفتش عن حبة جديدة ويعصرها ممكن يزيد الالتهاب والتصبغ والندبات من غير ما ينتبه
ما بنستعمل كريمات تفتيح عشوائية أو خلطات مجهولة، وما بنستعمل المونوبنزون (monobenzone) لآثار حب الشباب، لأنو ممكن يسبب فقداناً دائماً وغير منتظم في اللون، والحبوب الكبيرة والعميقة، خصوصاً في الوش أو الصدر والكتفين، محتاجة علاج مبكر عشان نقلل احتمال الندبات المرتفعة والجدرة Keloid
علاج حب الشباب في المراهقة هدفو يقلل الحبوب الجديدة، ويحمي لون الجلد، ويمنع الندبات، ويحافظ على ثقة المراهق في نفسو، النتيجة بتحتاج أسابيع وشهور من الانتظام، وما بنقيس نجاح العلاج من يوم ليوم قدام المرآة
في البوست الجاي حنتكلم عن الدمامل المؤلمة والمتكررة في الإبطين والثنيات، ومتين تكون خراجات عابرة ومتين نشك في التهاب الغدد العرقية القيحي (hidradenitis suppurativa)