في الحلقة الفاتت اتكلمنا عن سعفة الرأس، أو قوباء الرأس (Tinea capitis)، وقلنا إنها عدوى فطرية بتدخل جوا الشعرة نفسها، علشان كده الكريمات والشامبوهات براها ما بتكفي، لكن أحياناً جسم الطفل ما بكتفي بوجود الفطر ساي، يقوم يعمل رد فعل مناعي عنيف شديد، وهنا بتظهر حالة اسمها الكيريون (Kerion Celsi)
الكيريون شكلو بخوف: كتلة منتفخة ومؤلمة في فروة الراس، فيها قشور، وصديد، وشعر متساقط، وأحياناً لمن نلمسها الشعر بطلع بسهولة شديدة من غير مقاومة، وممكن الطفل يكون عندو تورم في الغدد اللمفاوية ورا الرقبة أو حرارة خفيفة، المنظر كلو ممكن يخلي الأهل أو حتى الطبيب يفتكروا إنها خراج بكتيري محتاج فتح وتنظيف جراحي
وهنا الغلطة الكارثية: الكيريون ما خراج عادي، هو التهاب شديد بسبب الفطريات ورد فعل المناعة ضدها، ولو اتفتح جراحياً كأنو خراج، ممكن يحصل تدمير لبصيلات الشعر، وبعدها يخلي صلع ندبي دائم (Cicatricial alopecia)، يعني المنطقة دي ما برجع فيها الشعر تاني كلو كلو
الفرق العملي بين الكيريون والخراج مهم شديد؛ الكيريون غالباً عندو تاريخ سابق لقشرة في الراس أو بقع شعر مكسّر، ومعاهو شعر بيتساقط بسهولة، وممكن يكون في أطفال تانيين في البيت أو المدرسة عندهم قشرة أو فراغات شعر، وبرضو ما بكون فيهو غالباً «نقطة تموج» (fluctuation point) واحدة واضحة زي الخراج البكتيري الحقيقي، وإنما كتلة ملتهبة رخوة نسبياً على مساحة أوسع من فروة الراس
العلاج الصاح ما هو الفتح الجراحي، وإنما مضاد فطريات بالفم زي الـ (Griseofulvin) أو الـ (Terbinafine) بحددو الطبيب حسب عمر الطفل ووزنو ونوع الفطر والمتاح، وفي الحالات الملتهبة بشدة ممكن الطبيب يضيف كورس قصير من الكورتيزون بالفم علشان يقلل الالتهاب ويحمي بصيلات الشعر من التلف، لكن القرار ده لازم يكون طبي، لأننا بنتعامل مع طفل والتهاب شديد واحتمال عدوى مصاحبة أحياناً
في السودان، المشكلة انو زراعة الفطريات ممكن تتأخر، وأحياناً ما بتكون متاحة أصلاً، وفي المدارس والخلاوي والمعسكرات العدوى بتنتشر بسرعة، علشان كده ما منطقي ننتظر النتيجة أسابيع والطفل شعرو بيتدمر؛ لو الصورة السريرية واضحة، الأفضل بدء العلاج المضاد للفطريات فوراً بعد تقييم الطبيب، بدل الانتظار الطويل
والوقاية ما أقل أهمية من العلاج؛ لازم نوقف مشاركة الأمشاط والطواقي والمخدات، وننظف الأمشاط بمطهر مناسب أو مبيض مخفف وبعد داك نغسلها كويس، ونفتش الإخوة والأطفال المخالطين، ده لأنو ممكن يكون في طفل عندو سعفة خفيفة هو مصدر العدوى، وبرضو لو في قطط أو كلاب في البيت وعندها مناطق شعر ساقط أو قشور لازم تتفحص، لأنو بعض أنواع الفطريات ممكن تنتقل من الحيوانات
في الحلقة الجاية حننزل من فروة الراس للجلد كلو، ونتكلم عن القوباء أو الحصف (Impetigo)، العدوى البتمسك الوش والأطراف وبتنتشر بسرعة البرق بين الأطفال، وممكن تبدأ بقشرة عسلية بسيطة وتنتهي بمضاعفات ما متوقعة