في البوست الفات شفنا إن الميكرونيدلينق عندو مكان قوي في علاج ندبات حب الشباب، خصوصا الندبات الضامرة المناسبة، السؤال البجي بعد داك طبيعي: لو الوخز نفسه بستدعي الترميم، إضافة البلازما الغنية بالصفيحات بتزيد النتيجة فعلا ولا بس بتزيد تكلفة الجلسة؟
البلازما الغنية بالصفيحات (Platelet-Rich Plasma)، أو (PRP)، بتتجهز من دم المريض نفسو، الدم بتسحب ويتفصل بالطرد المركزي، فنحصل على جزء فيه تركيز أعلى من الصفائح الدموية مقارنة بالبلازما العادية، الصفائح دي ما شغلتها إيقاف النزف بس، جواها حبيبات فيها عوامل نمو، وعوامل تانية بتدخل في تنظيم الالتهاب وبناء الأوعية وإعادة تشكيل النسيج
يعني الميكرونيدلينق حرث الأرض واستدعى فرق البناء، والبلازما بتضيف وسط غني بإشارات النمو في نفس المكان (سماد)، الفكرة البيولوجية منطقية: إصابة محسوبة مع تركيز أكبر من الإشارات البتشارك في الترميم،
لكن المنطق براهو ما بكفي، وعشان كده نرجع للدراسات
في مراجعة تحليلية جمعت ١٤ دراسة وحوالي ٤٧٢ مريض، ولقت إن الجمع بين الميكرونيدلينق والبلازما زاد فرصة الوصول لتحسن أكبر من خمسين بالمية مقارنة بالميكرونيدلينق براهو، وبرضو ارتفع رضى المرضى، من غير زيادة واضحة في المضاعفات الخطيرة في الدراسات المجموعة
وفي تجربة معماه محكمة، التحسن كان ٨٢٪ مع الجمع بين الميكرونيدلينق والبلازما، مقابل ٦٢٪ مع الميكرونيدلينق براهو، الرقم جذاب، غير إننا ما حنحولو آليا لوعد فردي، لأن طريقة تحضير البلازما، وتركيز الصفائح، وطريقة المسح أو الحقن، ونوع الندبات وعدد الجلسات كلها بتختلف من دراسة للتانية
دي نقطة مهمة في قراءة أي إعلان عن (PRP)، كلمة «بلازما» ما معناها إن كل جلسة في أي عيادة هي نفس المنتج البيولوجي، لأن طريقة الفصل، وحجم الدم، وعدد دورات الطرد، وتركيز الصفائح، وهل البلازما اتحقنت أو اتختت فوق الجلد بعد الوخز، كلها تفاصيل بتغير النتيجة النهائية
وبرضو الجمع ما ضروري لكل حالة، فمريض عندو ندبات مناسبة للعلاج وبستجيب كويس للميكرونيدلينق فممكن ما يحتاج تكلفة إضافية، بينما حالة تانية ممكن الطبيب يشوف فيها إن الجمع منطقي ضمن الخطة، القرار ما مفروض يبدأ من إن «الجلسة الأغلى أقوى»، وإنما من نوع الندبة والهدف والتوقعات والميزانية
والسلامة عندها نفس القاعدة القديمة: كون البلازما جاية من دم الزبون نفسه بقلل مشكلة التحسس من مادة غريبة، لكن الإجراء نفسه محتاج سحب دم وتعقيم وتحضير مضبوط، البلازما المجهزة بطريقة رديئة أو البيئة غير المعقمة ما بتاخد حصانة عشان اسمها ذاتية
وفي الحلقة الجاية حنشوف جمع مختلف: الميكرونيدلينق مع التقشير الكيميائي، وكيف علاج بشتغل أعمق ممكن يتضاف ليهو علاج للسطح، خصوصا في ندبات حب الشباب