من بعيد الأجهزة التلاتة شكلها بيؤدي نفس الشغل: إبر صغيرة تدخل الجلد، لمن نقرب، طريقة الحركة، والتحكم في العمق، ومساحة العلاج، والتعقيم بتفرق بصورة كبيرة
أقدم شكل مشهور هو الدرماروللر (Dermaroller)، أسطوانة صغيرة مركب عليها عدد من الإبر، تمر فوق الجلد ذهاب وجية، بما إن الإبر مثبتة في أسطوانة بتلف، حركتها عبر الجلد مرتبطة بقوس دوران الأسطوانة، ميزتو إنو بسيط وسريع لتغطية مساحة واسعة، وعيبو إن التحكم في كل وخزة أقل من الجهاز الآلي، خاصة في المناطق المنحنية والصغيرة
الدرمابن أو قلم الوخز الآلي (Automated microneedling pen) شغلو مختلف، الكارتردج في رأس القلم فيه مجموعة إبر تتحرك دخول وخروج بصورة متكررة، والعمق في الأجهزة الطبية قابل للضبط، ده بدي الطبيب سيطرة أفضل على مناطق مختلفة من الوش وعلى الانتقال بين جلد سميك ومنطقة أرق، مع إمكانية استعمال كارتردج معقم مخصص للجلسة
الدرماستامب (Dermastamp) أبسط من القلم الآلي، الإبر فيه مثبتة على رأس صغير بيتضغط عموديا على منطقة محددة بدل ما يتدحرج فوقها، ميزتو الأساسية الدقة الموضعية، عشان المساحة المعالجة في الضغطة الواحدة صغيرة، وهو أقل انتشار من الأقلام في العيادات الحديثة
هنا في فرق مهم بين «الجهاز معتمد» و«الميكرونيدلينق معتمد لكل حاجة»، اعتماد جهاز لاستعمال معين ما شهادة مفتوحة لاستعمالو للكلف، والشعر، والبهاق، وكمان كل سيرم ممكن نختو مع الجلسة، ما مشمول مع الاعتماد بتاع الجهاز، فاستعمال الجهاز لتوصيل مستحضرات أو أدوية أو مواد بيولوجية عبر الجلد عندها أدلتها وبروتوكولاتها المنفصلة، وحنجيها في بوستاتها
أما العمق، فالرقم المكتوب على الجهاز بختلف، بعض الأجهزة الطبية المعتمدة بتسمح بتعديل طول بروز الإبرة، والاختيار مرتبط بمكان العلاج وسمك الجلد والهدف السريري والجهاز نفسه، استعمال الأجهزة المنزلية بيلغي أهم جزء في الموضوع: تقييم الجلد، واختيار النقطة النهائية، وضبط الإصابة، وبرضو مطابقة العمق الحقيقي مع المكتوب بعتمد على جودة صناعة الجهاز وسعره
أهم فرق عملي بالنسبة للزبون ما عدد الإبر المكتوب في الإعلان، وإنما هل الجهاز طبي ومعروف، هل الكارتردج معقم وأحادي الاستعمال، وهل الزول البحدد العمق عارف الجلد والمشكلة البعالجها، وفي الحلقة الجاية حنشوف الجهة المقلقة من الحكاية: نفس الفكرة لمن تطلع من العيادة وتدخل البيت بجهاز رخيص، وإبرة يعاد استعمالها، وكريم ما اتصمم عشان يدخل جوه الجلد