بعد ستة بوستات من الخلطات البلدية، حنمشي للجهة التانية من الرف: القزازات المرتبة، والألوان الجميلة، والكلمات المكتوبة قدام العبوة: ترطيب، إصلاح، نمو، كيراتين، أركان، بيوتين، وكولاجين، والمشكلة هنا إن الواجهة الأمامية للمنتج إعلان، والمعلومة الحقيقية موجودة وراهو في قائمة المكونات
أول حاجة نقرا الترتيب بتاع المكونات، ففي أنظمة وسم مستحضرات التجميل زي النظام الأمريكي، المكونات الموجودة بتركيز أعلى من واحد بالمية بتتكتب بترتيب تنازلي بظهر العبوة حسب الكمية بتاعتها، أما التركيزها أقل من الواحد بالمية فممكن يتغير ترتيبها، عشان كده أول مجموعة من المكونات بتدينا فكرة قوية عن عضم المنتج، من غير ما نفترض إن خامس مكون مكتوب عندو نسبة سحرية ثابتة أو إن كل حاجة بعدو مجرد زينة
لو واجهة العبوة مكتوب عليها «زيت أرغان» ولقيتي الزيت بعيد في القائمة، فده بقول بس إن زيت الأرغان ما هو البنية الأساسية للتركيبة، والمنتج ممكن يكون ممتاز بسبب منظفاتو أو مواد التكييف الموجودة قبالو، عشان كده القراءة الصاح بتبدأ من الوظيفة المركز عليها المنتج، ما من النجم المرسوم قدام القزازة
عشان نبسط الموضوع، أي منتج شعر ممكن نفككو لست عائلات كبيرة، في منظفات (Surfactants) شغلتها تمسك الدهون والوسخ وتساعدها تنزل مع الموية، وفي مواد تكييف موجبة الشحنة (Cationic conditioners) بتلتصق بساق الشعرة وتقلل الاحتكاك، وفي جاذبات للموية (Humectants) زي الجلسرين، وفي ملطفات (Emollients) بتخلي السطح أنعم، وفي خواتم (Occlusives) وزيوت وسيليكونات بتقلل فقدان الموية وتدي انزلاق، وفي بروتينات ومشتقات بروتين بتعمل تغليف مؤقت للمناطق المتضررة
الخطوة البعدها إننا نسأل: ياتو عائلة من ديل هي المسيطرة؟ شامبو بداية مكوناتو منظفات قوية حيكون مختلف من شامبو بدايتو منظفات ألطف ومعاها مواد تكييف، حتى لو الاتنين مكتوب عليهم «مرطب»، وبلسم مليان كحولات دهنية ومواد موجبة حيختلف من بلسم تقيل مليان زبدات وزيوت، وسيرم بخت سيليكون في بداية قائمة المكونات حتبقى شغلتو الأساسية هي الانزلاق والحماية السطحية، وما عندو سبب يتحول لعلاج للبصيلة لمجرد إن الإعلان كتب «تحفيز نمو الشعر»
وبرضو كلمة «كحول» براها ما كفاية للحكم، في كحولات قصيرة ممكن تكون مجففة حسب التركيبة، وفي كحولات دهنية زي سيتيل وستياريل وسيتيريل بتدخل في البلاسم عشان التليين وبناء قوام المنتج، نفس الشي مع السيليكون: وجودو ما حكم بالإدانة، السيليكونات ممكن تقلل الاحتكاك وتحسن الانزلاق وتحمي الشعر المتضرر، والمشكلة عند بعض الناس بتكون في التراكم مع روتين تنظيف ما مناسب
العطر قصة تانية، وجود العطر ممكن يكون طبيعي بالنسبة لمنتج تجميلي، غير انو الفروة الحساسة أو المصابة بأكزيما تلامسية ممكن تتضايق من العطور ومكوناتها، عشان كده الزولة العندها حكة مستمرة بعد إستعمال المنتجات الجديدة، محتاجة تقرا خانة العطر بنفس اهتمامها بخانة زيت الأرغان
الخطوة البعدها هي اننا نطابق الملصق مع شعرنا، الشعر الناعم البتلبدو المنتجات بسرعة محتاج تركيبات أخف، والشعر المجعد الناشف ممكن يستفيد من تكييف وختم أعلى، الفروة فيها قشرة محتاجة تفكير في المادة الفعالة على الفروة، بينما الأطراف المتكسرة محتاجة انزلاق وحماية، وفي جفاف السودان، الجاذب البمسك موية ممكن يحتاج معاهو خاتم يساعد الموية تفضل جوه ساق الشعرة
من البوست ده لقدام، أي قزازة حندخلها السلسلة حنفككها بالطريقة دي: شنو القاعد في أول الملصق، العائلة المسيطرة، بنفع لمنو، ممكن يتعب منو منو، والإعلان قال شنو مقارنة بالموجود جوه العبوة، وفي الحلقة الجاية نبدأ بالشامبوهات اللطيفة والخالية من السلفات، ونشوف ست قزازات ممكن يكون مكتوب عليها كلام قريب بينما الكيمياء جواها مختلفة شديد