بعد ما اتكلمنا عن المسامية، طبيعي نلقى السؤال الجاي واقف في الباب: أعمل طريقة LOC ولا LCO؟ أخت الموية بعدين الزيت بعدين الكريم؟ ولا الموية بعدين الكريم بعدين الزيت؟ وفي السوشيال ميديا الموضوع مرات بتعاملوا معاهو كأنو معادلة مقدسة: لو شعرك عالي المسامية اعملي كده، ولو منخفض اعملي كده، ولو عكستي الترتيب شعرك حيزعل منك، لكن خلينا نفك الحكاية بهدوء
الحروف دي اختصار لكلمات بسيطة: السائل (Liquid)، والزيت (Oil)، والكريم (Cream)، الفكرة كلها إنو الشعر محتاج موية، وبعدها محتاج حاجة تحبسها جوه الساق، خصوصاً في بيئتنا الجافة الحارة البتطير الترطيب أسرع من بخار الشاي، وأول تصحيح لازم نثبتو إنو الزيت براهو ما برطب، الترطيب الحقيقي بجي من الموية أو الكريم المائي، أما الزيت فبشتغل كعازل بختم الموية وبيقلل الاحتكاك، يعني لو ختيتي زيت على شعر ناشف تماماً وما فيهو موية، كأنك قفلتي الغطاء على حفاظة فاضية
الفرق بين الطريقتين هو ترتيب الطبقات؛ طريقة LOC (موية، زيت، كريم) بتختم الترطيب بالزيت بدري، وبعدو الكريم بيدي وزن وتحديد للكيرلات، ودي بتنفع للشعر الخشن والكثيف أو الأطراف شديدة الجفاف، أما طريقة LCO (موية، كريم، زيت) فبتخلي الكريم المائي يلامس الشعرة أول، والزيت يجي في النهاية كنقاط على الأطراف عشان يختم، ودي غالباً أسهل وأخف على أغلب أنواع الشعر الكيرلي والمجعد في الاستخدام اليومي
وعشان نطبق ده بحاجاتنا المتاحة في السودان وبدون تكاليف عالية، خطوة السائل (L) ممكن تكون موية عادية في بخاخ، أو مخلوطة بنقطة موية ورد أو جل صبار خفيف، وخطوة الكريم (C) ممكن تكون كريم مائي خفيف، أو زبدة شيا أفريقية مخففة في اليد، أما خطوة الزيت والختم (O) فزيوتنا المحلية فيها الخير والبركة؛ لو شعرك بحب الزيوت الخفيفة والمتوسطة، زيت السمسم البلدي أو جوز الهند أو اللوز الحلو خيارات ممتازة ما بتلبد الشعر، ولو شعرك سميك وخشن وأطرافو ناشفة شديد، نقاط من زيت الخروع التقيل أو حتى مسحة خفيفة جداً من الكركار السوداني التقليدي المطور على الأطراف بس، بتعمل أقوى طبقة عازلة وبتحفظ الموية أيام
وما في قانون ثابت بمشي على كل راس، المقياس الحقيقي هو سلوك شعرك بعد الساعات الأولى؛ لو بقى لين والأطراف طرية وما في كتمة، فالطريقة ماشية معاك كويس، ولو حسيتي بتلبيد وملمس شمعي، معناها المنتجات تقيلة أو الكمية زايدة، وفي جونا السوداني الناشف، المواد الجاذبة للموية زي الجلسرين أو العسل لو ما اتختمت بعدها بطبقة زيت كافية، ممكن تسحب الترطيب من الشعرة للهواء وتديك إحساس جفاف، عشان كده التحدي في قفل الموية بالقدر البناسب جوك ما بكثرة الطبقات ، ولأن الأطراف هي أقدم وأضعف جزء في شعرك، حتى لو ما دايرة تعملي الطريقة دي للراس كلها، اعمليها كنسخة مصغرة للأطراف بس: رشي موية، وأضيفي كريم بسيط، واختمي بنقطة زيت من زيوتنا، وافتكري دايماً إن الفروة مكان تنظيف وما محتاجة تراكم زيوت وكريمات
طريقة LOC و LCO أدوات بتعلمنا ترتيب الوظائف: الموية للترطيب، الكريم للانزلاق والنعومة، والزيت للختم وتقليل الاحتكاك، وما معادلة سحرية بتعوض النظافة والبلسم واختيار الكمية المناسبة، وفي الحلقة الجاية حنمشي أعمق في الترطيب نفسه: الماسكات والبخاخات، وحنفك الفرق بين الجاذبات والملطفات والخواتم بطريقة تخليك تقري أي منتج من أول خمسة مكونات
#حكاية_الشعر
#عيادات_بيت_العافية
#عيادة_الجلدية_أون_لاين