الفيتكس جل مضاد للأكسدة، مادتو الفعّالة خلاصة من نبات الشمام (Cucumis melo) غنية بإنزيمين مضادين للأكسدة ، الفكرة الورا الكريم دي كالآتي: في جلد مريض البهاق بتتراكم مادة اسمها فوق أكسيد الهيدروجين (H₂O₂)، وهي من الجذور الحرة (free radicals) البتأذي الخلايا الصباغية (melanocytes)، الخلايا البتصنع لون الجلد، فلو جبنا كريم بكنس المادة الضارة دي من الجلد، المفروض الخلايا ترتاح واللون يرجع تدريجياً، النظرية دي اسمها نظرية الإجهاد التأكسدي (oxidative stress)، وهي فعلاً جزء حقيقي مثبت من قصة مرض البهاق
المنطق ده مغري ومقنع للوهلة الأولى، ولو وقفنا عندو بس كان الفيتكس بقى علاج مثالي، المشكلة إنو المنطق الحلو براهو ما بكفي، لازم الدراسة المحكمة تثبت إنو الكريم بشتغل فعلاً على أرض الواقع، ولمن الباحثين اختبروا الفيتكس وأشباهو في دراسات عشوائية محكمة (randomized controlled trials)، الصورة طلعت مخيّبة
في دراسة جربت جل الفيتكس مضاف للعلاج الضوئي بالأشعة فوق البنفسجية الضيقة (narrow-band UVB)، وطلع إنو المرضى البستخدموا الفيتكس فوق العلاج الضوئي ما اتحسنوا أكتر من البستخدموا العلاج الضوئي براهو، ودراسة تانية جربت كريم شبيه الكاتالاز ضد كريم وهمي (placebo) خالي من أي مادة فعّالة، وما لقت فرق يُذكر بين الاتنين، حتى الدراسة الأشهر في الموضوع، البجربت شبيه الكاتالاز مع العلاج الضوئي، خلصت لنفس الحكم: الكريم ما بضيف حاجة فوق العلاج الضوئي براهو
وعشان نكون منصفين، في دراستين لمّحن لإشارة فائدة صغيرة، بس بشروط ضيقة: واحدة بالحبوب المأخوذة بالفم ما بالكريم، وواحدة في مناطق أصلاً بتستجيب كويس للعلاج الضوئي، وحتى الإشارة دي ما وصلت لقوة يعتمد عليها الطبيب، فالحكم الصادق إنو الأدلة على الفيتكس في البهاق ضعيفة، ده ما بيعني إنو الكريم بضر، هو آمن ومحتمَل كويس وما بسبب أعراض تُذكر، إنما ما في دليل قوي إنو بشفي البهاق أو بضيف حاجة فوق العلاجات المثبتة
وهنا نقطة تخص الزول السوداني بالذات: البهاق على البشرة الداكنة (Fitzpatrick IV-VI) بكون واضح جداً وبحمل عبء نفسي تقيل، والناس بتصرف قروش كتيرة ورا كريمات بتوعد بالشفا وأدلتها هشّة، العلاج الحقيقي بمشي تحت إشراف طبيب جلدية، ولو حبيت تستعمل الفيتكس كمكمّل جنب العلاج المثبت وتحت إشراف، ما في مانع، إنما تعتمد عليهو براهو وتنتظر منو معجزة، دي خسارة للوقت والقروش والأمل
#عيادات_بيت_العافية
#عيادة_الجلدية_أون_لاين
#البهاق