القسم الأول: نعرف شعرنا (1/6) - شعرك محتاج تفهم ومعرفة

بالعيادة الأون لاين، الجملة دي بتتكرر لحدي ما بقت شبه لازمة:

"دكتور، شعري بصل طول معين وبعدها بوقف، مهما أعمل ليهو زيوت، كريمات، خلطات، ما بزيد سم واحد"

أحياناً البت تكون متأكدة إنو شعرها كسِل، وأحياناً الأم تكون شايلة هم بنتها: «شعرها كان طويل وهي صغيرة، هسع بقى واقف في نص الطريق،» وأحياناً الزولة يكون داخلة أصلاً بسؤال جاهز: "أحسن حاجة بتطوّل الشعر شنو؟"، المفارقة إنو السؤال دا، رغم إنو شائع، غالباً ما ماشي في الاتجاه الصحيح، شعرك ما وقف نمو في الغالب، شعرك بتكسر، دي الفكرة البتقوم عليها السلسلة كلها

قص الأطراف ممكن يحافظ على الشعر من التقصف، بس ما بغير سرعة النمو، الزيت ممكن يقلل الاحتكاك ويحمي الساق، بس ما بطلع شعرة جديدة من الجذر، الخلطة الممكن تفيد ساق الشعرة ما عندها سلطة سحرية على المصنع التحت الجلد

المشكلة في حالات كتيرة بتحصل فوق، ما تحت، الشعرة طالعة من الجذر، وماشية في طريقها شهر ورا شهر، وبعدين في الأطراف بتتعرض للغسيل القاسي، والتسريح على الناشف، والحرارة، والفرد، والشد، والنوم على قطن خشن، وشمس السودان، والغبار، وموية البير العسرة في بعض البيوت، كل ضربة صغيرة براها ممكن ما تعمل كارثة، لكن لما تتجمع، بتعمل زي حيطة مونتها بدأت تتفتت حبة حبة، وفي النهاية الشعرة بتتكسر من طرفها، وإنتي بتعايني في المراية وتقولي: النمو وقف!

هو ما وقف، الحاصل إنو الجذر بزيد من هنا، والطرف بنكسر من هناك، لو الاتنين متساويين، الطول الظاهر بثبت، كأنك بتصب موية في جردل، والجردل ذاتو فيهو خرم صغير تحت، المشكلة ما في الحنفية دائماً، مرات المشكلة في الخرم، عشان كده أول فرق لازم نعرفو في السلسلة دي: التساقط غير التكسر

التساقط الحقيقي بطلع من الجذر، تلقى الشعرة طويلة، وفي نهايتها نقطة بيضا صغيرة كالبصلة (club bulb)، ده ممكن يحصل بعد ولادة/جراحة، أو مرض شديد - ملاريا أو تيفويد، أو نقص حديد/فيتامين د، أو ضغط نفسي كبير، أو اضطراب غدة، أو حمية قاسية، لكن ده موضوع عندو مسار مختلف وحنجيهو بهدوء

التكسر موضوع تاني، بتلقى فيهو شعر قصير بأطوال مختلفة، وقطع صغيرة في المشط أو على المخدة، ما فيها بصيلة بيضا، ده معناه إنو الساق ذاتها اتكسرت، والساق، بالمناسبة، نسيج ميت، الجزء الحي في البصيلة قاعد تحت الجلد، عشان كده الساق ما «بتتعالج» بمعنى ترجع زي ما كانت، إنما بنحميها من زيادة التلف، ونقلل الاحتكاك، ونحافظ على الموية جواها، ونقص المتقصف لمن يلزم

وشعر السودان ما نوع واحد، في بيت واحد ممكن تلقى شعر مستقيم، ومتموج، وكيرلي، ومجعد شديد، ما في نوع أرقى من نوع، في شعر طريقتو أسهل في الزيوت والغسيل، وفي شعر محتاج فهم أكتر لأنو اللفة بتاعتو ذاتها بتخلي الزهم الطبيعي ما يصل الأطراف بسهولة، فالنشاف هنا موش إهمال ولا قلة نظافة، دي هندسة محتاجة فهم

السلسلة دي حتكون عن فهم الشعر نفسه:

حنبدأ من البصيلة والساق: شنو الحي وشنو الميت؟

حنمشي لأنواع الشعر في السودان، وليه الشعر بلتف، وليه الجفاف جزء من تركيبتو.

حنشرح الغسيل، الشامبو، البلسم، السدر، الترسبات، الزيوت، الكركار، المسامية، وطرق الترطيب المشهورة: شنو منها مبني على علم قوي، وشنو منها ممارسة منطقية لكن دليلها ضعيف.

حنفرق بين التكسر والتساقط، بين الشعر البقع من الجذر والشعر البتكسر من النص.

حنحكي عن الحرارة، الفرد، الصبغات، التسريحات المشدودة، الحنة، القشرة، الحكة، نقص الحديد، فيتامين د، البيوتين، والمينوكسيديل

وغيرهم الكثير عشان نصل لفهم علمي واضح يخلي التفكير حول العناية واضح بعيد عن الدعايات والموضات

في الحلقة الجاية حنبدأ بجوه الشعرة نفسها، من البصيلة الحية تحت الجلد للساق الميتة الفوق، عشان نفهم ليه الوقاية أهم من أي وعد بالإصلاح

#حكاية_الشعر

#عيادات_بيت_العافية

#عيادة_الجلدية_أون_لاين