جلد الطفل ما نسخة مصغرة من جلد الكبار، تخيلوا جلد طفلكم سبورة بتتكتب عليها صحتو كلها من أول يوم، لكنها سبورة أرق بكتير من سبورة الكبار، الطبقة الخارجية للجلد - الطبقة القرنية (stratum corneum) - عند المولود أرق بحوالي تلاتين بالمية 30% من جلد الكبار، وده بيعني إنو الحاجز الجلدي - الحيطة البتحمي الجسم من العالم الخارجي - عند الطفل حيطة رقيقة المونة، المونة دي زي ما عرفنا في سلاسل سابقة هي خط الدفاع الأول، ولمن بتكون رقيقة الموية بتتبخر من الجلد أسرع - وده اسمو فقدان الموية عبر الجلد (transepidermal water loss) - والبكتيريا والفطريات بتلقى الباب مفتوح، وعساكر المناعة الجلدية لسه ما اتدربوا كويس على التعامل مع الغزاة
عشان كده جلد الطفل بتأثر بأي حاجة أسرع من جلد الكبار - الحرارة، الجفاف، العدوى، وحتى الكريمات والأدوية البنمسحها فوقو، الدراسات والأرقام بتقول إنو اتنين وتسعين فاصلة ستة بالمية 92.6% من الأطفال عندهم مشكلة جلدية واحدة على الأقل، يعني تقريباً كل طفل سوداني عندو حكاية مع جلدو، وفي دراسة بمستشفى الأمراض الجلدية بالخرطوم، سبعة وأربعين فاصلة خمسة بالمية 47،5% من أمراض جلد الأطفال كانت عدوى - فطريات وبكتيريا وطفيليات
ومع ذلك السودان فيهو أقل من طبيب جلدية واحد لكل مليون نسمة، يعني أطباء الأطفال وأطباء الأسرة هم خط الدفاع الأول والأخير في أغلب الحالات، بينما في دراسة حديثة بينت إنو تلاتة وستين فاصلة خمسة بالمية 63.5% من أطباء الرعاية الأولية في السودان بواجهوا صعوبة في تشخيص أمراض الجلد
الفجوة كبيرة، غير أن المشكلة الأكبر ما في عدد الأطباء براهو - المشكلة إنو "القاموس" الطبي نفسو، الكتب والأطالس والصور البندرس منها ونتعلم منها، مكتوب لبشرة ما بتشبه بشرتنا، عشرين بالمية 20% بس من صور أطالس الجلدية الطبية بتمثل البشرة الداكنة، الطبيب بتعلم يشخص على بشرة فاتحة، وبعدين بنطلب منو يشخص على بشرة غامقة – بينما بشرتنا ليها لغة تانية خالص في التعبير عن المرض
السلسلة دي حتعلمنا نقرا جلد أولادنا بعيون سودانية، من أول يوم ولادتو لحدي سن المراهقة، حنمشي مع الطفل مرحلة مرحلة: المولود الجديد وطفحو البخوف أي أم، الرضيع ومشاكلو مع الحر والحفاضات، الطفل في المدرسة والفطريات والحساسية، والمراهق وحب الشباب والندبات، حنتعلم متين نطمئن ومتين نفزع ومتين نجري الطوارئ
وفي البوست الجاي حنبدأ من أخطر فجوة - حكاية "الأحمر الما بنشوفو" وليه الالتهاب في بشرة أطفالنا ليهو لغة مختلفة لازم نتعلمها
#حكاية_جلد_الصغار
#عيادات_بيت_العافية
#عيادة_الجلدية_أون_لاين