أي أم في الدنيا لمن بتشوف أي حاجة على جلد مولودها الجديد - حبوب، بقع، تغير لون - أول حاجة بتجيها في بالها: ده مرض خطير، الخلعة طبيعية، والقلق مبرر، لكن الحقيقة هي انو أغلب الطفح الجلدي في أول تمنية وعشرين 28 يوم من حياة المولود ما مرض خالص
غالبيتو العظمى طفح فسيولوجي (physiological eruption) - يعني الجسم بتأقلم مع البيئة الجديدة بره الرحم، فالمولود كان تسعة شهور في بيئة مائية معزولة عن كل شيء - ما في هوا، ولا بكتيريا، ولا تغيرات حرارة، وفجأة بتولد ويلقى نفسو قدام عالم مليان هواء جاف وبكتيريا طبيعية وحرارة متغيرة وملابس، فلازم جلدو يستجيب لده كلو - ويظهر على شكل "طفح" قد يخوف الأهل
فكيف نفرق بين الطبيعي والخطير؟
المفتاح الأول هو الزمن، ففي جلدية المواليد، السؤال ما "شكلو شنو" بس - السؤال الأهم "ظهر متين بالضبط؟"، الحاجة الموجودة من لحظة الولادة غير الحاجة الظهرت في اليوم التالت غير الحاجة الجات بعد أسبوعين، كل توقيت بشير لمجموعة مختلفة من الاحتمالات
في أول شهر، المولود ممكن يظهر عليهو حاجات كتيرة كلها سليمة وعابرة: حبوب بيضاء صغيرة بدون احمرار موجودة من الولادة - دي اسمها البثار الصباغية العابرة (TNPM)،أو حبوب صغيرة حولها هالة حمرة أو بنفسجية بتظهر بعد يومين لخمسة - دي اسمها الحمامى السمية (ETN) ورغم اسمها المخيف هي سليمة تماماً، أو حبوب بيضاء ناعمة زي اللؤلؤ على الأنف والخدود - دي الدخنيات اللبنية (milia)، أو طفح حراري صغير جداً على الراس والرقبة - ده بسبب الحر أو اللف الزائد، أو تغير لون الجلد لشكل شبكي زي الرخام لمن الجو يبرد - ده اسمو الجلد الرخامي (cutis marmorata) ويختفي طوالي لمن الطفل يتدفأ
كل الحاجات دي بتختفي براها بدون أي علاج، ما بتحتاج أي كريم ولا مرهم ولا دوا، التدخل هنا ما بس ما ليهو فايدة - ممكن يضر، لكن - وهنا لازم ننتبه - في خط أحمر واحد واضح: حويصلات أو بثور على جلد المولود مصحوبة بحمى أو خمول أو رفض الرضاعة، فالعرضين الاتنين ديل مع بعض بيعنوا حالة الطوارئ لحدي ما يتأكد العكس، فالهربس الوليدي (neonatal HSV) مثلاً حالة بتحتاج علاج فوري وأي تأخير ممكن يكون خطير جداً
وفي نقطة مهمة خاصة ببشرتنا: بعض الحالات السليمة العابرة في البشرة الداكنة بتسيب وراها بقع غامقة - تصبغ بعد الالتهاب (PIH) - بتفضل أسابيع أو حتى شهور بعد ما الحالة نفسها تختفي، وده طبيعي تماماً، وما داعي للقلق، البقع دي بتخف تدريجياً براها
في البوست الجاي حنبدأ نتعرف على الحالات دي واحدة واحدة، ونبدأ بأشهرها في أول يوم ولادة - "حبوب بيضاء صغيرة على جسم المولود ما حولها أي احمرار" - ونشوف ليه دي ذاتها علامة مميزة للبشرة الداكنة
#حكاية_جلد_الصغار
#عيادات_بيت_العافية
#عيادة_الجلدية_أون_لاين