في تقنية واحدة بتقدر تمشي لأصل حب الشباب من غير كبسولات ولا مضادات حيوية طويلة، وتستهدف الغدة الدهنية ذاتها بدل مطاردة الحبة بعد ما تظهر، والأجمل من كده إنها آمنة لكل أنواع البشرة، حتى الداكنة جدا، لأنها ما داخلة في معركة مع الميلانين أصلاً
الكلام هنا عن ليزر 1726 نانومتر، الموجود في أجهزة زي AviClear من Cutera وAccure، الفكرة العلمية وراهو أنيقة جداً: الزهم، أو الزيت الجوا الغدة الدهنية، بيمتص الضوء عند الطول الموجي ده أكثر من الماء بحوالي واحد فاصلة اتنين مرة، يعني الجهاز برسل طاقة ضوئية بتميل تمشي للغدة الدهنية نفسها، تسخنها بصورة انتقائية، وتقلل نشاطها، كأنك بدل ما تقفل الماسورة من برة، مشيت للمحبس ذاته وخففت تدفق الزيت من المنبع
الميزة الكبيرة هنا إن 1726 نانومتر ما بستهدف الميلانين، والصبغة دي هي السبب البخلي كثير من الليزرات محتاجة حذر شديد في البشرة السمراء، عشان كده الأجهزة دي اتصممت من البداية كعلاج “صديق للبشرة الداكنة”، مع تبريد وحسابات طاقة تحمي سطح الجلد وتوصل التأثير للغدة الدهنية
عادة البروتوكول بكون تلاتة جلسات شهرية، النتيجة ما بتجي بين يوم وليلة، لأننا بنغيّر سلوك الغدة الدهنية تدريجياً، في دراسة Alexiades المنشورة في JAAD، وبعد تلاتة جلسات شهرية، قرابة تمانين بالمية من المرضى وصلوا لانخفاض 50% أو أكثر في البثور الالتهابية بعد 12 أسبوع، والرقم زاد لقرابة سبعة وتمانين بالمية بعد 26 أسبوع، وفي بيانات ممتدة، التحسن ممكن يستمر 12 شهر وأكثر عند بعض المرضى
ده بخلّي التقنية خيار جذاب للناس الما بقدروا أو ما دايرين يمشوا في طريق الإيزوتريتينوين: زولة بتخطط للحمل قريب، أو زول عندو خوف شديد من الآثار الجانبية، أو مريض استهلك مضادات حيوية كتيرة وما داير يواصل نفس السكة، لكنه علاج مكلف، ولسه غير متوفر عملياً في السودان حسب المتاح لينا، بينما ممكن تلقاه في مراكز مختارة بالخارج
بعد كده عندنا تقنية مختلفة اسمها RF Microneedling، زي Morpheus8 وSecret RF وGenius، هنا ما في ضوء داخل على الجلد، في إبر دقيقة بتدخل لعمق محسوب، وبعدها تطلق طاقة ترددية (radiofrequency) تحت سطح الجلد، ودي نقطة مهمة للبشرة الداكنة، لأن الطاقة بتطلع من طرف الإبرة في العمق، بدل ما تمر عبر الميلانين من السطح
الفائدة هنا تلاتية: جزء من الحرارة بقلل نشاط الغدد الدهنية، وجزء بطفئ الالتهاب حوالين البصيلة، وجزء بوقظ الكولاجين، فالعلاج بلمس الحبوب النشطة ويبدأ في نفس الوقت يمهد لعلاج الندوب، عشان كده بكون مفيد للزول العندو حب شباب مقاوم ومعاه بداية آثار أو مسام واسعة أو ندوب سطحية، غالباً بنحتاج تلاتة لأربعة جلسات، وبين الجلسة والتانية أربعة إلى ستة أسابيع والنتيجة تعتمد بشدة على خبرة الطبيب، وعمق الإبر، والطاقة، وحالة البشرة في يوم الجلسة
القاعدة الذهبية إن التقنيات دي ما مفروض نعاملها كبديل كامل للأدوية، هي بتكمّل الخطة، وبتفتح باب مهم للحالات المقاومة، أو للناس الما متحملين الأدوية، أو للمرضى العندهم خوف حقيقي من العلاجات الفموية، العلاج الحديث ما بفتش عن بطل واحد، بقدر ما بكون فريق مناسب لكل جلد
وفي إجراءات أبسط، يدوية، بقدر يعملها طبيب الجلدية في العيادة بدون أجهزة معقدة، وحنفصّل فيها في البوست الجاي
#حكاية_حب_الشباب #عيادات_بيت_العافية #عيادة_الجلدية_أون_لاين