علاجات حب الشباب لتكيس المبايض

(متلازمة المبيض الأيضية متعددة الغدد الصماء)

بنت عندها متلازمة المبيض متعدد الكيسات (PCOS) أو بإسمها الجديد متلازمة المبيض الأيضية متعددة الغدد الصماء ( PMOS)، مشوارها مع الكريمات والمضادات الحيوية كان طويل ومتعب، تتحسن شوية وترجع تاني، لحدي ما الطبيب وقف قدام السؤال الأكبر: هل نحن بنعالج الوش بس، ولا بنعالج الإشارة الجاية من جوا الجسم؟

في النوع ده من حب الشباب، الغدة الدهنية مرات تكون واقفة تحت ضغط هرموني وأيضي مستمر، عشان كده في بعض الحالات بنحتاج علاجات أقوى من السبيرونولاكتون، أو علاجات بتشتغل على مقاومة الإنسولين ذاتها

أول اسم في الباب ده هو Cyproterone Acetate، وده مضاد أندروجين قوي، أقوى من السبيرونولاكتون، ممكن يستخدم براهو بجرعات زي 25 إلى 100 ملغ يومياً، أو يجي داخل حبوب منع حمل مركبة مع الإستروجين، زي Diane-35، فعاليته ممكن تكون واضحة في حب الشباب المصاحب للشعر الزائد والدهون العالية واضطراب الدورة، بس قوته دي جاية معاها مسؤولية كبيرة

السيبروتيرون ما دواء عادي يتاخد من الصيدلية عشان الحبوب، لأنو ممكن يأثر على الكبد، عشان كده بحتاج متابعة وفحوصات عند الاستخدام الأطول أو الجرعات الأعلى، وبرضو بزيد خطر التجلطات، خصوصاً لو في عوامل خطورة زي التدخين أو تاريخ تجلطات أو صداع نصفي، وفوق ده كلو، استعمال الجرعات العالية اتقيّد بشدة في دول كثيرة بسبب ارتباطو بخطر الورم السحائي (Meningioma)، خصوصاً مع الجرعات التراكمية الطويلة، عشان كده مكانو الحقيقي تحت إشراف صارم، وبعد ما الخيارات الأخف تكون ما كفت

بعده في دواء أقوى وأخطر اسمو Flutamide، هو مضاد أندروجين شديد الفعالية، لكن مشكلتو الكبيرة سمية الكبد، الجرعة المعروفة قد تصل إلى 250 ملغ مرتين يومياً، بس في الجلدية بقى استخدامو نادر جداً، ومحجوز لحالات مختارة بعناية، لأن علاج حب الشباب ما مفروض يدفع المريض تمن أكبر من المرض ذاته

في جهة تانية، عندنا Finasteride وDutasteride، دي أدوية بتثبط إنزيم 5-alpha-reductase، يعني بتقلل تحويل التيستوستيرون إلى الصورة الأقوى DHT، استعمالها في حب الشباب محدود ومختار، وبيستعمل أكثر في حب شباب الجسم الشديد عند بعض الذكور البالغين، أما عند النساء الحوامل أو الممكن يحملن، فدي منطقة ممنوعة، لأنها ممكن تسبب تشوهات في الجنين الذكر

ثم نصل للميتفورمين (Metformin)، وده مختلف تماماً، أصله دواء للسكري النوع التاني، بس في PCOS قيمته كبيرة لأنه بشتغل على مقاومة الإنسولين، لمن حساسية الجسم للإنسولين تتحسن، إشارات IGF-1 والأندروجينات ممكن تهدأ، والغدد الدهنية تلقى ضغط أقل، عشان كده الميتفورمين بكون مفيد خصوصاً لو في PCOS، كمقاومة إنسولين ووزن زائد، أو BMI مرتفع

غالباً بنبدأ بجرعة 500 ملغ يومياً، وبعدها نرفع تدريجياً حسب التحمل لحدي 1500 ملغ يومياً أو حسب الخطة، التدرج مهم لأن أكثر عرض جانبي مزعج هو اضطراب المعدة والإسهال، خاصة في البداية، وعلى المدى الطويل، لازم ننتبه لفيتامين B12، لأن نقصو ممكن يحصل مع الاستخدام الطويل

وفي ناس ما بتتحمل الميتفورمين أو بفتشوا عن بديل ألطف، هنا بجي دور Myo-inositol، هو مكمل غذائي بساعد في تحسين حساسية الإنسولين، وعندو دليل علمي معتدل في PCOS، هو ما أقوى من الميتفورمين، وما مفروض نبيعه للناس كمعجزة، لكنه خيار آمن ومفيد عند كثيرين، خاصة في الحالات الأخف أو كجزء من خطة أوسع

المهم في البوست ده إننا نفهم إن علاج حب الشباب الهرموني درجات، في زولة بكفيها سبيرونولاكتون، وفي زولة محتاجة حبوب منع حمل مناسبة، وفي زولة قصتها أعمق، هنا العلاج الناجح ما بكون كريم على الوش فقط، بل خطة تربط الجلد بالهرمونات وبالأيض وبنمط الحياة

وفي الحالات الشديدة اللي ما استجابت لكل ده، أو بدأت تعمل ندبات، أو تعبت نفسية المريض لسنوات، بنحتاج العلاج الأقوى في حب الشباب: الإيزوتريتينوين، وده موضوع البوست الجاي

#حكاية_حب_الشباب #عيادات_بيت_العافية #عيادة_الجلدية_أون_لاين