في حبوب عندها توقيت بفضحها، الزول يدخل جاكوزي، أو مسبح صغير، أو حوض موية دافية ما متعقم كويس، وبعد يومين أو تلاتة يلقى في الجسم بثور صغيرة حمراء أو قيحية، خصوصا في المناطق الكانت مغطاة بالمايوه أو الملابس المبلولة، هنا القصة غالبا ما حب شباب، دي ممكن تكون التهاب جريبات الجاكوزي (hot tub folliculitis)
السبب الأشهر بكتيريا اسمها الزائفة الزنجارية (Pseudomonas aeruginosa)، ودي بتحب الموية الدافية والرطوبة، وبتلقى فرصة لو مستوى الكلور أو التعقيم ما مضبوط، الحبوب غالبا بتكون مفاجئة، متشابهة، ومعاها حكة أو وجع خفيف، وتظهر في الصدر، والبطن، والضهر، والأرداف، أو الفخذين، المعلومة المريحة إنها في ناس كتار بتهدأ براها خلال أيام لو المناعة سليمة، مع تجفيف الجلد وتجنب نفس مصدر الموية، لكنها لو شديدة، مؤلمة، أو جاية مع سخانة وتعب عام، فدي محتاجة معاينة طبية
الفرق بينها وبين حب الشباب إنو حب الشباب ما بظهر فجأة بعد حوض موية، حب الشباب عندو ظهور كوميدونات، وتاريخ أطول، وارتباط بالغدد الدهنية والبصيلة، أما التهاب الجاكوزي فغالبا مرتبط بحدث واضح: موية دافية، أو ملابس مبلولة قعدت فترة، أو مسبح تعقيمو ضعيف، عشان كده السؤال عن السباحة أو الجاكوزي أحيانا هو مفتاح التشخيص
في نوع تاني أخطر اسمو التهاب الجريبات بسالبات الغرام (Gram-negative folliculitis)، ده بظهر أحيانا عند زول استخدم مضادات حيوية لحب الشباب لفترة طويلة، خصوصا تتراسيكلينات أو مضادات متكررة، فالميكروبيوم يتغير وتلقى بكتيريا مختلفة فرصة تطلع حول الأنف والفم، فجأة الزول الأخد علاج لشهور ينتهي ببثور قيحية أو عقد أعمق حوالين الأنف والشفايف، ويظن إن حب الشباب "قاوم العلاج"، بينما المشكلة إن العلاج الطويل نفسو غيّر نوع البكتيريا
هنا زيادة المضاد القديم بخفه ممكن تزيد المرض، الطبيب قد يحتاج مزرعة بكتيرية عشان يعرف البكتيريا ونوع حساسيتها، وبعدها يختار علاج موجه، وأحيانا في الحالات المقاومة يكون الآيزوتريتينوين (isotretinoin) هو الطريق الأفضل لأنه بقلل الزهم والبيئة البتعيش فيها البكتيريا بدل مطاردة المضادات بلا نهاية
وبعد ما تتبعنا مسار المحاكيات، حنرجع للعوامل البتحدد شدة حب الشباب، وأولها الجينات
#حكاية_حب_الشباب #عيادات_بيت_العافية #عيادة_الجلدية_أون_لاين