في الصيدلية مرات تلقى واقي شمس مكتوب عليهو SPF عالي، وBroad Spectrum، ومكوناتو شكلها محترم شديد، فتقول: خلاص ده أفضل واقي شمس، لكن في الجلد، كلمة “أفضل” دي ما بتنفع براها، لأن الواقي البكون ممتاز لزول، ممكن يكون ورطة لزول تاني
خلونا نمسك مثال عملي: أحد مراجعي العيادة راجل سوداني عمره خمسة وتلاتين سنة، لون جلدو من النوع التالت في تصنيف فيتزباتريك (FST III)، عايش في مصر، وعندو وردية وجه Rosacea حصلت بسبب استعمال كورتيزون موضعي gفترة طويلة، رسل بستفسر عن واقي معين مع صورة للمكونات.
في المثال ده، الواقي كان فيهو فلاتر ممتازة فعلاً، زي Tinosorb S وTinosorb M وAvobenzone وTitanium Dioxide، يعني من ناحية الحماية من الأشعة فوق البنفسجية، التركيبة قوية ومطمئنة، لكن في نفس الوقت العبوة دي كان فيها مكوّنين بخلونا نتريث شوية: أوكسي بنزون (Oxybenzone)، وده معروف إنو ممكن يعمل حساسية ضوئية عند بعض الناس، وزيت جوز الهند، وده ممكن يكون تقيل ومسد للمسام أو مهيج في بشرة فيها وردية وحاجزها متكسر
المشكلة هنا ما إن الواقي “كعب”، بالعكس، ممكن يكون مناسب جداً لزول تاني بشرتو عادية أو جافة، وما عندو وردية، وحاجز الجلد عندو سليم، وعايش في جو محتاج حماية قوية وما بتضايقو القوامات التقيلة، فكده حياخد من الواقي فايدتو: حماية واسعة، ثبات كويس، وترطيب معقول، لكن صاحب الوردية الناتجة من الكورتيزون جلد وشو عامل زي حيطة المونة المتكسرة، أي مادة قابلة للتهييج بتدخل أعمق، وأي قوام تقيل ممكن يزيد السخانة، واللسعان، والاحمرار بتاع الوردية
عامل السكن برضو مهم، مصر فيها شمس قوية وحرارة وغبار، فالواقي لازم يكون ثابت وواسع الحماية، لكن في نفس الوقت ما يكون خانق على بشرة ملتهبة أصلاً، وعامل اللون مهم كمان، لأن البشرة السودانية والمتوسطة عموماً بتخاف من التصبغ بعد الالتهاب، فالحماية اليومية مهمة، ووجود أكاسيد الحديد (Iron Oxides) بكون إضافة جميلة لو في بقع أو كلف، لكن غيابها ما بخلّي الواقي فاشل، بخلّيه بس أقل مثالية في حالات معينة
عشان كده، اختيار واقي الشمس ما مفروض يكون بنظام “الناس شكروهو”، ولا “الغالي أكيد أحسن”، ولا “SPF خمسين وخلاص”، القرار الصاح بجي من تحليل بسيط: فلاتر الحماية شنو؟ هل في عطور أو مواد مهيجة؟ القوام خفيف ولا تقيل؟ الجلد ده دهني ولا جاف ولا حساس؟ الزول عايش في حر ورطوبة ولا برد وجفاف؟ ولون الجلد عندو قابلية للتصبغ قدر شنو؟
ما في واقي شمس عالمي بنفع لكل الناس، في واقي مناسب لشخص محدد، في بلد محدد، وبحالة جلد محددة، والواقي الممتاز علمياً ممكن يكون غير مناسب طبياً لجلد ملتهب، زي ما الحذاء الممتاز ممكن يجرحك لو مقاسو ما مقاسك
#عيادات_بيت_العافية #عيادة_الجلدية_أون_لاين #حكاية_الشمس_والبشرة