"يا دكتور، ولدي في ظفرو نقطة بيضاء، قالوا لي دا نقص كالسيوم، أديهو شنو؟"
دي من الرسائل البتجينا في العيادة الأونلاين، صورة لظفر صغير، وفيهو نقطة بيضاء مدورة أو شبه خط صغير، والأم قلقة، والجدة غالباً حسمت الموضوع: "دا نقص كالسيوم"، بعدها يبدأ مشوار الحليب، والجبنة، والمكملات، وربما شراب كالسيوم من غير تحليل ولا حاجة حقيقية، لكن خلونا نقيف هنا شوية، لأن النقطة البيضاء الصغيرة في الظفر من أكثر العلامات البريئة التي ظلمها الناس وربطوها بالكالسيوم بلا دليل قوي
الاسم الطبي للحالة دي هو Leukonychia punctata، يعني بياض نقطي داخل صفيحة الظفر، ودي غالباً بتحصل من خبطة صغيرة جداً في مصنع الظفر، المصفوفة القابعة تحت الجلدة الحامية، خبطة الطفل في الباب، لعبو في الحوش، عض الظفر، قلع الجلد حول الظفر، أو حتى ضغط بسيط ما اتذكر أصلاً، المصفوفة وهي بتصنع الظفر تتلخبط لحظة صغيرة، فتدخل فقاعات دقيقة أو خلايا كيراتين غير مكتملة النضج داخل الظفر، وبعد أسابيع تطلع لينا كنقطة بيضاء ماشية لقدام مع نمو الظفر، وحتروح بدون حوجة لأي تدخل ولا كالسيوم.
لكن ما كل بياض في الظفر بريء، هنا تبدأ أهمية التمييز، النقطة البيضاء الصغيرة المتفرقة غير الخطوط البيضاء العرضية المنتظمة، لو شفت خط أبيض واحد عريض أو أكثر، ماشي بعرض الظفر كله، خصوصاً لو في عدة أظافر وفي نفس المستوى، هنا ما بنتعامل معاه كنقطة طفل بريئة، فالخطوط البيضاء العرضية الحقيقية، زي Mees’ lines، ممكن تظهر بعد أمراض شديدة، أدوية معينة، تسممات نادرة، فشل كلوي، أو إجهاد جسدي قوي، الفرق إنها بتكون خطوط عرضية واضحة، غالباً في أكثر من ظفر، وبتتحرك مع نمو الظفر لأنها داخل صفيحة الظفر نفسها
وفي علامة ثانية مهمة اسمها Muehrcke’s lines، ودي ما جوه الظفر بل في سرير الظفر من تحت، وتظهر كخطين أبيضين متوازيين، وتختفي أو تخف لما نضغط على الظفر، وما بتتحرك مع نموه، دي ممكن ترتبط بنقص شديد في بروتين الدم أو الألبومين، خصوصاً في أمراض الكلى أو الكبد أو سوء التغذية الشديد، عشان كدا اختبار الضغط البسيط مفيد: لو البياض اختفى بالضغط، غالباً مصدره السرير تحت الظفر، ولو فضل ثابت وماشي مع النمو، غالباً داخل الظفر نفسه
في البوست الجاي حنرجع لفكرة "ذاكرة الظفر" بصورة أوضح، ونتكلم عن خطوط بو، المطبات العرضية التي تظهر بعد الحمى، كوفيد، التيفوئيد، الملاريا، الجراحة، أو أي مرض شديد يوقف مصنع الظفر مؤقتاً
الحلقة القادمة: خطوط بو وتوقف المصفوفة
#حكاية_الظفر #عيادات_بيت_العافية #عيادة_الجلدية_أونلاين