حمو النيل Miliaria لمن العرق يتحبس تحت الجلد

حمو النيل من أكثر الحاجات البنقابلها مع الحر والرطوبة واللبس التقيل، خصوصاً عند الأطفال، لكن برضو بظهر عند الكبار، خاصة في الرقبة، الصدر، الظهر، تحت الإبط، وبين ثنيات الجلد،

الحكاية ببساطة إن الجلد عندو مواسير ملفلفة صغيرة جداً بتطلع العرق لبره عشان تبرد الجسم، لمن الجو يكون حار، والعرق كتير، واللبس خانق، أو الكريمات تقيلة وقافلة المسام، المواسير دي بتنسد بسبب انتفاخ الخلايا المبطنة للقنوات العرقية (بالضغط الاسموزي للملح بالعرق)، والعرق بدل ما يطلع، بيتحبس تحت الجلد، فبعمل حبوب صغيرة مع إحساس حكة، أو لسعة كأن الجلد بيقول: “أنا مكتوم خلوني أتنفس”

عشان كدا علاج حمو النيل، ببدأ بالمنطق البسيط: برّد الجلد وقلل العرق، بهدوم قطنية واسعة، وحمام فاتر أو بارد، وتهوية كويسة، وتخفيف البطاطين واللف الزائد للأطفال، وتجنب الكريمات الدهنية التقيلة لأنها ممكن تقفل المسام زيادة، ولو في حكة مزعجة، ممكن نستخدم لوشن مهدئ بسيط زي الكلامين، وأحياناً الطبيب بكتب كريم كورتيزون خفيف لفترة قصيرة لو الالتهاب شديد أو حبوب، لكن ما نستخدم كريمات قوية ساكت من نفسنا، خصوصاً للأطفال والوجه والثنيات

والوقاية هنا أهم من العلاج، الطفل ما محتاج يتلف كأنو داخل شتاء أوروبا وهو قاعد في حر السودان، والكبير البعرق كتير محتاج يختار لبس واسع مهوي، ويستحم بعد العرق، وينشف الثنيات كويس، ويتجنب إنو يخت مرهم تقيل في الحر ويطلع للشمس

لكن هنا بنرفع جرس إنذار صغير: ما كل حبوب في الحر هي حمو نيل، لو الحبوب فيها صديد واضح، أو طالعة حول الشعر وبتوجع، ممكن تكون التهاب بصيلات الشعر (Folliculitis)، لو الطفح في ثنيات الجلد ومعاه احمرار وحرقان وريحه أو تشقق، ممكن يكون التهاب فطري، لو الحكة شديدة بالليل وفيها خطوط صغيرة بين الأصابع أو حول الرسغ، بنفكر في الجرب، ولو الطفح جا فجأة بعد دواء جديد أو مع حرارة وتعب عام، ما بنسميه حمو نيل ونقفل الملف، لأنو ممكن يكون حساسية دواء أو مرض جلدي محتاج تقييم

#عيادات_بيت_العافية

#عيادة_الجلدية_أون_لاين