قبال نواصل السلسلة

أول حاجة لازم نرسخها ونأكد عليها هي إنو السرية والخصوصية (Confidentiality and privacy) في العيادات والمراكز الطبية هي حق قانوني وأخلاقي مطلق للمريض، وماف زول من الكادر الطبي من حقه يحكم عليك أو يوجه ليك لوم أخلاقي، لأنو تعاملنا هنا طبي بحت ومعركتنا هي مع المرض والتخفيف من معاناتك، ويفترض يكون في مراكز متخصصة للفحص الطوعي والمستمر، والتحاليل المعملية لازم بتتم بأعلى درجات السرية وبكود أو أرقام مشفرة في كتير من الأحيان لضمان راحة المريض النفسية.

النقطة الجوهرية التانية والمهمة لنجاح أي خطة علاجية هي "علاج الشريك" (Partner notification and treatment). في الأمراض المنقولة جنسياً، لو المريض أخد العلاج وشفى تماماً، لكن الطرف التاني (الزوج أو الزوجة) ما اتفحص وما أخد نفس العلاج، المرض حيفضل يلف في حلقة مفرغة ويرجع للطرف الأول تاني وتالت بمجرد ممارسة العلاقة الزوجية، وحتى لو الشريك ما ظاهر عليهو أي أعراض؛ لأنو زي ما شفنا في منشور الهربس والزهري والـ HPV، الأمراض دي ممكن تقعد في الجسم لفترات طويلة في حالة خمول وبدون أي أعراض ظاهرة.

المتابعة الدقيقة (Follow-up) مع الدكتور بعد نهاية كورس العلاج كمان حاجة أساسية، لأننا بنحتاج نتأكد من التئام القرح تماماً، وبنعمل فحوصات معملية تكرارية للتأكد من نزول نِسب الالتهاب في الدم، خاصة في أمراض زي الزهري عشان نضمن إنو المرض تم القضاء عليه وما دخل في مرحلة الخمول المتأخرة.

رغم الظروف الصعبة والإنسانية المعقدة المر بيها بلدنا حالياً بسبب النزاعات، واللي أكيد أثرت على توفر بعض التحاليل المتطورة والأدوية الحديثة، إلا إنو العلاجات الأساسية والمنقذة للحياة (زي حقن البنسلين للزهري، والأسيكلوفير للهربس، والبيرميثرين للجرب) لسه هي حجر الأساس ومتوفرة في معظم المراكز والمستشفيات الشغالة والعيادات الجلدية المتخصصة.

ما تترددوا ولا تخجلوا من الفحص، فحص بسيط ممكن يحميك ويحمي أسرتك وشريك حياتك من مضاعفات خطيرة شديد.

#عيادة_الجلدية_أون_لاين

#عيادات_بيت_العافية

#الصحة_التناسلية