حنتكلم عن نوعين من الالتهابات الجلدية المزمنة اللي ممكن تصيب المناطق التناسلية وتسبب إزعاج كبير:
أولاً، الحزاز المسطح التآكلي (Erosive lichen planus)، وده بيظهر غالباً في شكل بقع حمراء أو بنفسجية داكنة، لكن المشكلة الكبيرة فيه هي لما يتحول لشكل "تآكلي"، يعني الجلد في المنطقة دي ببقى ضعيف جداً وممكن يتشقق ويعمل قرح مؤلمة جداً وبتتعب المريض خاصة عند التبول أو أثناء العلاقة، في بشرتنا الداكنة، القرح دي غالباً بتسيب وراها تصبغات لونها غامق أو بني مائل للرمادي، وده شيء طبيعي بنشوفه بعد أي التهاب قوي في الجلد
ثانياً، الصدفية التناسلية (Genital psoriasis)، ودي بتختلف عن الصدفية اللي بتظهر في باقي الجسم، في العادة، الصدفية بنعرفها بالقشور الفضية والسميكة، لكن في المناطق الحساسة، بسبب الرطوبة والاحتكاك، القشور دي بتختفي وبتبقى البقعة مجرد بقعة حمراء أو بنفسجية لامعة ونضيفة، وغالباً بتكون في منطقة ثنايا الجلد
الصدفية هنا ممكن تكون صعبة في التشخيص لأنها بتتشابه مع الفطريات، وعشان كده بنحتاج دكتور شاطر عشان يفرق بينهم، لأنو علاج الصدفية بختلف تماماً عن علاج الفطريات، ولو استخدمنا كريمات غلط ممكن الحالة تسوء
في حالة الحزاز المسطح والصدفية، العلاج الموضعي هو الخطوة الأولى، وبنستخدم فيه كريمات كورتيزون بتركيز متوسط لقوي، أو بدائل تانية زي مثبطات الكالسينيورين (مثل التاكروليمس)، ومرات بنحتاج نستخدم علاجات جهازية أو حبوب إذا كانت الحالة مستعصية وما استجابت للكريمات
نصيحتي ليكم في المنشور ده: ما تحاولوا تشخصوا الحالة بنفسكم وتجربوا كريمات من الصيدلية، لأنو المنطقة دي حساسة جداً والتشخيص الخاطئ ممكن يطول معانا فترة العلاج ويخلينا نعاني من مضاعفات زي التصبغات أو القرح، لو في بقعة مستمرة، لونها متغير، أو فيها ألم وتشققات، لازم تستشيروا أخصائي جلدية
في المنشور التاسع، حنتكلم عن موضوع شائع جداً وبنسمع عنه كتير، وهو الإكزيما والتحسس في المناطق الحساسة، وليه المواد اللي بنستخدمها يومياً ممكن تكون هي السبب
وزي ما اتفقنا في المنشور الأول، ممكن تبحثوا بالأسماء دي بالانجليزي في صور جوجل (Google Images) وتضيفوا كلمة بشرة داكنة (Dark skin) عشان تتعرفوا على شكلها في لون بشرتنا المعتاد
#عيادة_الجلدية_أون_لاين
#عيادات_بيت_العافية
#الصحة_التناسلية