حنبدا بالتهاب المهبل الفطري (Vulvovaginal candidiasis)، البعمل إفرازات بيضاء متكتلة بتشبه الجبنة، وحكة شديدة جداً، مع احمرار في المنطقة، المهم هنا إنو في بشرتنا الداكنة، الاحمرار ده ما بكون واضح زي ما مكتوب في الكتب الطبية الغربية، لكن بظهر بلون أحمر غامق، أو بنفسجي، أو بني غامق وحتى رمادي، وممكن تظهر حبوب صغيرة حوالين المنطقة، وبعد ما تخف بتخلي وراها تصبغات داكنة بتزعج المريضة
عند الرجال، نفس الفطر ده بعمل التهاب الحشفة الفطري (Candidal balanitis)، وبظهر في شكل بقع حمراء باهتة بتلمع، مع تراكم إفرازات بيضاء تحت القلفة، المشكلة دي شائعة جداً عند الرجال الما مختونين والمصابين بالسكري، ونسبة انتشارها بتصل لحوالي خمسة وتلاتين في المية في الفئة دي، عشان كده، لو الالتهاب ده بجيك بصورة متكررة، يعني أكتر من أربع مرات في السنة، لازم وحتماً تمشي تفحص السكري، لأنو الالتهابات الفطرية المتكررة دي مرات بتكون هي أول علامة لمرض السكري الما مشخص، وكمان بتحتاج لعلاج وقائي لفترة طويلة بتوصل لستة شهور
النوع التاني من الفطريات هو سعفة الفخذ (Tinea cruris)، دي بتعمل بقعة قشرية شكلها زي الحلقة، أطرافها بارزة ونشطة، وبتكون فاضية من النص، والمميز فيها إنها ما بتصيب كيس الصفن أو عمود القضيب عكس فطر الكانديدا، وفي البشرة السودانية، البقعة دي بتظهر بلون بني أو رمادي غامق بدل اللون الأحمر، المشكلة الكبيرة اللي بنواجهها في صيدلياتنا في السودان هي الاستخدام العشوائي لكريمات الكورتيزون لعلاج الحكة دي، وده بعمل لينا حالة معقدة بتخلي الفطريات تغير شكلها وتنتشر بدون حدود واضحة وتبقى صعبة في التشخيص والعلاج
بالنسبة للعلاج، التهابات الكانديدا بتتعالج بكريمات مضادة للفطريات زي الكلوتريمازول مرتين في اليوم لمدة لأسبوعين أو ثلاثة، أو بحبة فلوكونازول جرعة واحدة بالفم، أما سعفة الفخذ، فبتتعالج بكريمات زي التيربينافين أو الكلوتريمازول لمدة أسبوعين لأربعة أسابيع، وممكن نحتاج حبوب لو الحالة منتشرة شديد
أهم حاجة النظافة والتجفيف الكويس للمنطقة لأنو الفطريات بتحب الرطوبة، وأرجوكم تجنبوا استخدام أي كريمات فيها كورتيزون للحكة من غير وصفة طبية، في المنشور الجاي حنتكلم عن حكة من نوع تاني، وهي الجرب وقمل العانة، وكيف نقدر نعالجها من جذورها
,زي ما اتفقنا في المنشور الأول، ممكن تبحثوا بالأسماء دي بالانجليزي في صور جوجل (Google Images) وتضيفوا كلمة بشرة داكنة (Dark skin) عشان تتعرفوا على شكلها في لون بشرتنا المعتاد
#عيادة_الجلدية_أون_لاين
#عيادات_بيت_العافية
#الصحة_التناسلية