من أشهر الكتل دي هي الأكياس الدهنية أو الأكياس البشروية (Sebaceous/epidermoid cysts)، دي بتكون عبارة عن كتل أو عقد قوية شوية وممكن تتحرك تحت الجلد، ولونها بيكون نفس لون الجلد، ومرات بيكون فيها نقطة صغيرة في النص، الأكياس دي بتظهر كتير على كيس الصفن عند الرجال أو الشفرين عند النساء، الحاجة المطمئنة إنها أكياس حميدة تماماً وما بتخوف، إلا لو حصل فيها التهاب أو تلوث، التعامل معاها بيكون بمجرد المراقبة، وما بتحتاج تدخل جراحي أو إزالة إلا لو كانت مسببة أعراض أو إزعاج للمريض
عندنا في السودان حالة خاصة ومهمة شديد لازم ننتبه ليها، وهي إنو الأكياس البشروية دي (Epidermoid inclusion cysts) بتظهر بصورة متكررة جداً وأحياناً بتكون أحجامها كبيرة عند النساء كنتيجة لمضاعفات الختان الفرعوني (FGM)، كمان ممكن تظهر ندبات جدرية بارزة (Keloid scarring) في نفس المنطقة كواحدة من المضاعفات الجلدية للختان، الحاجات دي مرات بتعمل قلق للبنات والمتزوجات، لكنها قابلة للتعامل الطبي
زي ما قلنا، الكتل والأكياس دي في الغالب بنخليها وما بنهبشها، لكن بنحتاج لتدخل جراحي بسيط لو الكيس التهب وعمل خراج، أو بقى مؤلم، أو كبر شديد وبقى مأثر على راحة المريض، الموضوع بسيط وما بستدعي القلق الزايد، لكن دائماً الفحص الطبي بقطع الشك باليقين وبخليك مرتاح البال
في المنشور السابع عشان حندخل في مرحلة مهمة جداً وحنتكلم عن الحزاز المتصلب (Lichen sclerosus)، وليه هو من البقع البيضاء اللي لازم ننتبه ليها شديد وما نهملها أبداً
وزي ما اتفقنا في المنشور الأول، ممكن تبحثوا بالأسماء دي بالانجليزي في صور جوجل (Google Images) وتضيفوا كلمة بشرة داكنة (Dark skin) عشان تتعرفوا على شكلها في لون بشرتنا المعتاد
#عيادة_الجلدية_أون_لاين
#عيادات_بيت_العافية
#الصحة_التناسلية