المشكلة دي بتجي بعد استخدام طويل ومستمر لكريمات التفتيح، وتحديداً الكريمات البتحتوي على مادة الهايدروكوينون، اللي هي علمياً ممتازة وفعالة جداً في علاج التصبغات لو اتصرفت بروشتة واستخدمت تحت إشراف طبيب ولفترة بسيطة، لكن استخدامها العشوائي وبتركيزات عالية لفترات طويلة بيخلي الجلد ينتج مادة معينة بسبب تثبيط خلايا اللون، بتتراكم وتتحول لمركب تاني بيترسب في الطبقات العميقة من الجلد وترتبط بالكولاجين فتعمل التصبغ العنيد دا.
الخطر الحقيقي قاعد في كريمات السوق والخلطات السحرية البتتباع بدون أي رقابة طبية، الحاجات دي غالباً بتكون مليانة كورتيزون وهايدروكوينون بتركيزات عالية شديد ومضرة عشان تدي نتيجة سريعة في البداية، والواحدة تفرح بالنتيجة وتستمر عليها وتدمنها، وبعد داك يبدأ التصبغ الغامق دا يظهر.
طيب لو - لا سمح الله - حصلت المشكلة دي، الحل شنو؟ أول وأهم خطوة، ودي الخطوة الما فيها أي نقاش، هي الوقف الفوري للكريمات دي وتجنب الشمس تماماً مع استخدام واقي شمس ممتاز باستمرار لأنو الشمس بتزيد الطين بلة.
علاج الحالة دي بيحتاج أمانة من الدكتور وصبر طويل جداً من المريض، لإنو التصبغ زي ما قلنا بيكون قاعد في طبقات عميقة، فبنلجأ لخيارات علاجية زي كريمات التقشير الطبية لتحفيز تجديد الخلايا، وبنعتمد بشكل كبير على جلسات الليزر المتقدمة عشان نكسر التصبغ دا حتة حتة، وأحياناً بنستخدم التقشير الكيميائي أو الإبر الدقيقة عشان نساعد الجلد يتخلص من المادة دي، بالاضافة لخطة مخصصة لحالة كل مريضة.
لكن عشان نكون واقعيين، العلاج بياخد شهور وممكن سنين أحيانا، والتحسن بيكون تدريجي وما دايماً بنقدر نرجع البشرة مية في المية زي ما كانت.
عشان كدا، نصيحتي ليكم من القلب، حافظوا على لونكم الطبيعي الجميل، ولو في أي مشكلة أو تصبغ في البشرة، أمشوا لدكتور الجلدية المختص وما تجازفوا بخلطات السوق وكلام الجروبات لأنو الثمن بيكون غالي شديد على بشرتكم وصحتكم النفسية.
#عيادة_الجلدية_أون_لاين
#عيادات_بيت_العافية