"جينات أبوك وأمك.. المسدس المحشي"
"يا دكتور، أبوي عنده صدفية وأخوي الكبير كمان، يعني أنا كمان لازم تجيني؟"
ده السؤال اللي بخلي الزول يقعد يعاين في جلده كل يوم بخوف ويفتش عن أي بقعة مشبوهة، والإجابة المختصرة هي: ما لازم، لكن الاحتمال عندك أعلى من جارك اللي ما عنده تاريخ عائلي، القصة الكاملة مكتوبة في شفرتك الجينية، وفهمها بفرق كتير في فهم المرض وحتى في اختيار العلاج المناسب.
الصدفية مرض "عائلي" بدرجة كبيرة
الدراسات اللي اتعملت على التوائم أثبتت إنو الوراثة مسؤولة عن حوالي 68% من احتمال الإصابة بالصدفية، يعني لو أخذنا توأمين متطابقين (جيناتهم واحدة بالضبط) وواحد فيهم عنده صدفية، احتمال التاني يكون عنده حوالي 33%، الرقم ده كبير جداً مقارنة بالتوائم غير المتطابقة (17% بس)، لكن لاحظ إنو ما 100%، وده معناه إنو الجينات براها ما كفاية عشان تسبب المرض، في حاجة تانية لازم تضغط الزناد، وده اللي حنتكلم عنه في بوست المحفزات.
الأرقام العملية اللي بقولها للمرضى في العيادة بسيطة ومباشرة: لو ما أبوك ولا أمك عندهم صدفية، احتمالك حوالي 4%، لو واحد فيهم عنده، الاحتمال بقفز لـ 28%، ولو الاتنين عندهم، الرقم بصل 65%، الأرقام دي بتساعد الناس يفهموا حجم الخطر من غير ما يتوهموا إنو "محتوم" عليهم
بطاقة الهوية الجينية: HLA-Cw6
اللي قرأ سلسلة المناعة الذاتية بتاعتنا بتذكر إنو كتير من الأمراض المناعية مرتبطة بجينات معينة في منطقة اسمها (HLA) على الكروموسوم السادس، في الصدفية، البطل هو جين اسمه (HLA-C*06:02) أو اختصاراً (HLA-Cw6)، وده لوحده مسؤول عن 35 لـ 50% من الخطر الوراثي الكلي، يعني لو الصدفية عندها "بطاقة هوية جينية"، الـ Cw6 هو الصورة اللي عليها.
الجين ده موجود بنسبة عالية عند سكان شمال أوروبا (حوالي 26% من الأصحاء عندهم نسخة منه)، وده بفسر ليه الصدفية منتشرة أكتر في النرويج والدنمارك وألمانيا، في المقابل، عند اليابانيين النسبة حوالي 10-12% بس، وعند السكان الأصليين بأستراليا والهنود الحمر اللي ما عندهم الجين ده أصلاً، الصدفية شبه معدومة، يعني الخريطة الجينية بتطابق الخريطة الجغرافية للمرض بصورة مذهلة.
والأهم من كدة، الـ Cw6 بيحدد "نوع" الصدفية اللي بتجيك، في تصنيف كلاسيكي مشهور بقسم الصدفية لنوعين: النوع الأول (ببدأ قبل سن الأربعين، وده 75% من الحالات) الـ Cw6 موجود في 85% منه، وبيكون عنده تاريخ عائلي قوي والمرض أشد، النوع الثاني (ببدأ بعد الأربعين) الـ Cw6 موجود في 15% بس، وغالباً ما في تاريخ عائلي واضح، يعني ما كل الصدفية واحدة، في "صدفية شباب" و"صدفية كبار" وكل واحدة ليها شخصيتها الجينية المختلفة.
أكتر من 65 موقع جيني.. كلهم في نفس الطريق
الـ Cw6 ما براهو، الدراسات الجينومية الواسعة (GWAS) لحدي 2024 اكتشفت أكتر من 65 موقع جيني مرتبط بالصدفية، والحاجة اللي بتلفت النظر إنو أغلب المواقع دي متجمعة حوالين نفس المحور اللي شرحناه في البوست الفات: محور (IL-23/Th17)، يعني الجينات بتقول لينا نفس القصة اللي الخلايا بتقولها: المرض ده محوره IL-23 وTh17، وكل الطرق بتؤدي لنفس الحريق.
في جينات مرتبطة بالـ IL-23 مباشرة ، وجينات مرتبطة بمسار الإشارة بتاعه ، وجينات مرتبطة بمسار الالتهاب ، حتى جينات حاجز الجلد نفسه متأثرة، زي حذف في جينات بتأثر على "المونة" الماسكة خلايا الجلد، وده بربطنا بقصة "الطوب والمونة" اللي حكيناها في سلسلة الترطيب.
جينان لازم كل طبيب يعرفهم
وسط الـ 65 جين ديل، في اتنين ليهم أهمية سريرية خاصة، الأول اسمه (CARD14)، ولما يحصل فيه طفرة تنشيطية بسبب صدفية عائلية شديدة وصدفية بثرية معممة، التاني اسمه (IL36RN)، ولما يفقد وظيفته بسبب حالة اسمها (DITRA) وهي الأساس الجيني للصدفية البثرية المعممة الخطيرة اللي حنتكلم عنها في بوست الطوارئ، معرفة الجينات دي مهمة لأنها بتفسر ليه بعض المرضى عندهم صدفية "عنيدة" وعائلية وبتبدأ من الصغر.
جيناتك بتحدد علاجك كمان
الحاجة العملية جداً اللي لازم يعرفها كل مريض وكل طبيب هي إنو الـ Cw6 زي ما بحدد خطر الإصابة، برضو بحدد الاستجابة للعلاج كمان، عقار الـ Ustekinumab (اللي بيستهدف IL-12/23) لما اتجرب، لقوا إنو المرضى الإيجابيين للـ Cw6 حققوا تحسن PASI 75 بنسبة 96% مقارنة بـ 65% بس عند السلبيين، يعني نفس الدواء بيشتغل أحسن بكتير عند ناس معينين بسبب جيناتهم، في المقابل، مثبطات IL-17 (زي Secukinumab وIxekizumab) بتشتغل كويس بغض النظر عن حالة الـ Cw6، وده بيدينا أداة عملية لاختيار العلاج الأنسب.
ده اسمه "الطب الشخصي" (Precision Medicine)، وفي المستقبل القريب حيكون فحص الـ Cw6 جزء روتيني من تقييم مريض الصدفية عشان نختار ليهو العلاج اللي جيناته بتستجيب ليهو أكتر.
المسدس والزناد.. مرة تانية
اللي تابعنا في سلسلة المناعة الذاتية بيتذكر مثال "المسدس المحشي والزناد"، هنا نفس المفهوم بالضبط: جيناتك هي المسدس المحشي بالرصاص، ممكن تعيش عمرك كله شايله وما يضرب، الزناد هو المحفزات اللي بتنقل المرض من "احتمال" مكتوب في الجينات لـ "حقيقة" ظاهرة على الجلد، ولو ما ضغطت على الزناد، المسدس ما بضرب براه، وده اللي بدينا أمل حقيقي، لأنو الزناد (على عكس الجينات) نحنا بنقدر نتحكم فيهو.
فشنو الحاجات البتضغط الزناد ده وتولع الصدفية فيك؟ في قائمة محددة وواضحة من المحفزات، بعضها حيفاجئك، وده اللي حنستعرضه المرة الجاية.
البوست القادم: "الزناد.. شنو البولع الصدفية فيك."
#عيادات_بيت_العافية #عيادة_الجلدية_أون_لاين #الصدفية