دايرين نهبش موضوع بيهم كل بيت وبيهم أي زولة بتفكر في موضوع "النضارة" وصحة الوش وهي بتخطط لتنظيم أسرتها، الحقيقة الموضوع ده فيهو خلط كبير، وكتير من البنات والنساء بيفتكروا إنو وسائل منع الحمل دي كلها واحد، أو كلها بتخرب الوش، لكن العلم عندو راي تاني خالص، والقصة فيها تفاصيل "تحت الجلد" محتاجة وقفة.
لو جينا مسكنا "الحبوب" (الحبوب المركبة) دي تحديداً، بنلقاها زي السلاح ذو الحدين، هي فيها هرمون الإستروجين، وده هرمون الأنوثة والجمال الأول، لأنو بشتغل زي "المايسترو" اللي بحفز الكولاجين في الجلد، فبتلقي الواحدة وشها بقى "ريان" ومشدود والتجاعيد الصغيرة بدت تختفي، والمسام بقت ضيقة واللمعة والصفاء (النضارة) زادوا بشكل ملحوظ
لكن، الإستروجين ده نفسو هو الصديق الودود لـ "الكلف"، هو اللي بحرض الخلايا الصبغية إنها تطلع لون زيادة، وعشان كدة حوالي ربع السيدات اللي بستعملوا الحبوب بعانو من بقع داكنة في وشهم، خاصة لو كانوا بطلعوا في شمسنا الحارة دي من غير واقي شمسي، فالحبوب بتديك نضارة وشباب، لكن ممكن تهديك كلف لو ما انتبهتِ.
أما "اللولب"، فقصتو بتعتمد على نوعو، اللولب النحاسي زول "مسالم" جداً، لا بقدم ولا بأخر في جمال الوش، لأنو ما فيهو هرمونات بتدخل في دورة الدم وتوصل الجلد، فوشك حيكون على حالو الطبيعي
لكن اللولب الهرموني قصتو مختلفة، لأنو بعتمد على هرمون "البروجسترون" وده هرمون مرات بيكون "ثقيل" على البشرة، وممكن يخلي الوش يطلع حبوب (حب شباب) أو يخلي البشرة زيتية زيادة، وده طبعاً بيطفي النضارة وبخلي الملمس خشن شوية، وعشان كدة بنلقى كتير من السيدات بشتكوا إنو وشهم بقى "باهت" بعد ما ركبوا اللولب الهرموني.
ونجي لـ "الحقنة" (حقنة التلاتة شهور)، ودي في عالم التجميل بنعتبرها الخيار الأصعب على الوش، الحقنة دي فيها جرعة عالية من هرمون البروجسترون، وده للأسف لا بساعد في بناء كولاجين ولا بخفف تجاعيد، بل بالعكس، ممكن يزيد من فرص ظهور التصبغات والكلف بطريقة مزعجة جداً، والأهم من كدة، إنها بتسرق "النضارة" والصفاء من الوش، وبتخلي البشرة تميل لأنها تكون "باهتة" ومجهدة، وأحيانا بتعمل "نفخة" في الوش بسبب احتباس السوائل
ودمتم بصحة وعافية
#عيادة_الجلدية_أون_لاين
#عيادات_بيت_العافية