الحالة دي الناس بتخجل تتكلم فيها أو حتى تستشير فيها دكتور، مع إنه بشكل معاناة يومية حقيقية وبأثر على جودة الحياة، وهي حكة كيس الصفن المزمنة أو زي ما بنسميها في الطب "Pruritus scroti ".
بحكم شغلي كطبيب جلدية، بشوف الحالات دي بصورة متكررة في العيادة، وغالباً الحالة دي بتصيب الرجال البالغين، وتحديداً في منتصف العمر وكبار السن، والمشكلة انها ما مجرد حكة عابرة، دي للأسف بتدخل المريض في حلقة مفرغة من الحكة والفرك الشديد اللي بيزيد سماكة الجلد والتهابه، ويخلي الإحساس بالحكة يرجع أشد وأقوى من الأول.
مرات بتكون مرتبطة بأمراض أو حالات طبية مصاحبة، كتير من الأحيان بنلقى المشكلة دي مرتبطة بالضغوطات النفسية والقلق المستمر اللي بيزيد من استجابة الجهاز العصبي للإحساس بالحكة، كمان ممكن تكون جزء من أمراض جلدية تانية زي الإكزيما أو الصدفية، وما بننسى إن مرضى السكري بكونوا عرضة أكتر للالتهابات الفطرية والبكتيرية في المنطقة دي بسبب التغيرات في مناعة الجلد، وفي بعض الحالات بيكون السبب مشكلة في الأعصاب الطرفية في أسفل الظهر بتدي إحساس مستمر بالحكة في المكان ده بدون أي التهاب ظاهر.
الوقاية دايماً خير من العلاج، وعشان نحمي نفسنا من المشكلة المزعجة دي ونقلل من تكرارها، لازم نهتم بتهوية المنطقة دي كويس ونحافظ عليها جافة وباردة قدر الإمكان، لبس الملابس الداخلية الواسعة المصنوعة من القطن الخالص بعمل فرق كبير جداً في تقليل الاحتكاك وتراكم العرق
كمان لازم نبعد تماماً عن استخدام الصابون القوي، والمعطرات، والفرك الشديد بالليفة، لأنو الجلد في المنطقة دي رقيق جداً وحساس لأبعد الحدود، أخيرا الاستحمام بموية فاترة وتنشيف المنطقة بلطف شديد بساعد في حماية الحاجز الطبيعي للجلد.
أما بالنسبة لخطتنا في العلاج، فبتعتمد في المقام الأول على كسر حلقة الحكة والهرش عشان ندي الجلد فرصة يتعافى، بنبدأ دايماً بمعالجة أي سبب واضح زي الفطريات أو البكتيريا لو ثبت وجودها، وبعدين بنلجأ لاستخدام كريمات الكورتيزون الموضعية بتركيزات خفيفة جداً، ولفترات قصيرة وتحت إشراف طبي دقيق لتفادي ترقق الجلد
ولأننا ما بنقدر نستخدم الكورتيزون لفترات طويلة، بنستعين ببدائل طبية ممتازة زي مثبطات الكالسينورين الموضعية اللي بتخفف الالتهاب بأمان أكبر على المدى الطويل، وأخيراً، ممكن نوصف حبوب مضادة للهيستامين، وتحديداً الأنواع اللي بتسبب شوية نعاس بالليل، عشان تهدي المريض وتساعده ينوم من غير ما يهرش وهو ما حاسي.
#عيادات_بيت_العافية #عيادة_الجلدية_أون_لاين