الإجابة ممكن تجي من معارفنا الحديثة حول المجتمع البكتيري بالجلد، تحديدا في غياب "الحارس"، لأنو هنا بيجي دور بكتيريا تانية طيبة ومسالمة اسمها المكورات البشروية، دي عايشة في جلدنا بسلام وعاملة زي الدرع البيولوجي الخفي.
البكتيريا الصديقة دي قاعدة عشان تمنع الغريب، لأنها بتفرز أسلحة كيميائية دقيقة زي الأحماض الدهنية ومضادات بكتيرية طبيعية بتكسر شوكة المكورات الذهبية وتمنعها تتلم وتعمل مستعمراتها البتمرضنا.
يلا، بمجرد ما التوازن البيئي دة يختل، وحراسنا ديل عددهم يقل أو كفاءتهم تضعف، بيحصل فراغ بيئي، فطوالي المكورات الذهبية بتستغل الفرصة دي وتتحول من كائن مسالم لممرض شرس بيخترق مسامات الشعر ويعمل لينا الالتهابات العميقة والمتكررة.
عشان كدة، فكرة إننا نغسل وندعك بصابون مضاد للبكتيريا ومطهرات قوية طول الوقت، دي ممكن تكون سلاح ذو حدين، لأنك كدة بتقضي على الحارس والمهاجم مع بعض، وبتخلي جلدك فاتح ومكشوف لأي هجمة أشرس في المستقبل أول ما البكتيريا ترجع.
الفهم الجديد للتوازن دة عمل نقلة نوعية في طرق العلاج، القصة ما عادت بس إننا ندي مضاد حيوي يقتل البكتيريا ويدمر معاها البيئة الطبيعية للجلد، لكن التوجه الطبي هسي بقى مركز أكتر في كيف نرجع التوازن المفقود.
العلاجات الحديثة بقت تركز على إننا نرمم حاجز الجلد، ونستخدم مرطبات تحافظ على حموضة الجلد الطبيعية عشان نوفر بيئة ممتازة للبكتيريا النافعة عشان تنمو فيها، وفي الأفق الطبي هسي في تقنيات واعدة جداً زي نقل الميكروبيوم الجلدي وزراعة السلالات الصحية عشان نرجع للجلد حارسه ومناعته الفطرية، ونكسر دائرة الخراجات المتكررة دي للأبد
#عيادات_بيت_العافية
#عيادة_الجلدية_أون_لاين
حنعمل سلسلة عن المايكروبيوم الجلدي ده وأهميته والدروس منو