الكائن ده من كتر ما هو جبار وقوي، العلماء أدوه لقب "كونان البكتيريا" على اسم الشخصية الأسطورية المقاتلة، لانو حرفيا بيرفض يموت.
عشان تتخيلوا معاي قوة التحمل دي، كفاية نعرف أن الإنسان الطبيعي ممكن يفقد حياته لو اتعرض لجرعة إشعاع مقدارها 5 جراي، لكن البكتيريا دي بتقدر تعيش وتتحمل جرعات إشعاع بتوصل لحد 15,000 جراي، يعني تلاتة ألف ضعف الجرعة البتقتل البشر!
والأعجب من كده، إنو لو الإشعاع أو أي كارثة تانية كسرت الحمض النووي بتاعها لـ 500 قطعة صغيرة، هي عندها قدرة إعجازية بتقدر بيها ترجع تركب وتصلح شريطها الوراثي بالكامل في خلال 12 لـ 24 ساعة بس.
غير كده، هي بتقدر تعيش بدون نقطة موية لسنوات، وبتتحمل درجات الحرارة المتجمدة، وحتى فراغ الفضاء الخارجي ما بأثر فيها.
عشان كده، ونيابة عنكم جميعا أنا قررت منح البكتيريا دي الجنسية السودانية فورا وبأثر رجعي، لأنها بتشبهنا شديد في الجلد وقوة التحمل ورفض الاستسلام، وبتعبر عن جينات البقاء العندنا البتخلينا نلملم شتاتنا ونقيف على حيلنا تاني في زمن قياسي مهما اتكسرنا أو اتعرضنا للدمار.
#خواطر_قرشية