العلم اتطور وبقى في مجال بحثي جديد وكامل اسمو "الميكروبيوم الجلدي Skin Microbiom "، والعلماء بدوا يبتعدوا من فكرة إبادة البكتيريا وجرجرتها بالمطهرات، لفكرة أذكى بكتير وهي كيف نغذي وندعم البكتيريا النافعة حقتنا، زي المكورات البشروية، عشان تبقى هي الدرع الواقي البتصد الميكروبات الشرسة وتمنعها تعمل لينا التهابات.
الفهم العميق دة عمل ثورة في منتجات العناية بالبشرة، والشركات الطبية الكبيرة بقت تصنع منتجات ذكية بتطبق الاكتشافات دي.
يعني مثلاً، بقينا نعتمد على كريمات وغسولات فيها "البريبايوتكس Prebiotics" ودي ببساطة عبارة عن أكل مخصص لتسمين البكتيريا الصديقة وتكبير كومها، زي الجلسرين بتركيزات عالية (٢٠٪)، أو الشوفان الغروي Otamel الموجود في منتجات زي أفينو Aveeno، لأنو بيعتبر غذاء ممتاز للبكتيريا النافعة وفي نفس الوقت بيهدي الالتهاب.
كمان عندنا منتجات زي بيوديرما أتوديرم Bioderma Atoderm البتستخدم سكريات معينة عشان تمنع البكتيريا الكعبة تلصق في الجلد وتوفر غذاء للحراس حقننا.
وفي منتجات تانية زي لا روش بوزيه في خط ليبيكار مثلا LipKar AP plus M Bauma بتستخدم مياه حرارية مستخلصين منها أجزاء من بكتيريا نافعة، عشان تغير بيئة الجلد وتخليها حمضية ومثالية لنمو حراسنا، ودة طوالي بيهدي هيجان الإكزيما وبيخلي المكورات الذهبية ما تلقى فرصة تعمل خراجات.
السمح في الموضوع إنو حتى بعض عاداتنا البيتية والبلدية طلعت متماشية تماماً مع الفهم الحديث، وبتدعم بيئة جلدنا المذهلة.
يعني استخدامنا للبن الرايب أو الزبادي كماسكات أو غسول طلع تطبيق عملي بيدي الجلد بكتيريا حية وأحماض طبيعية بتنافس البكتيريا الضارة وتطردها برة الميدان.
ونفس الفهم بيجي في استخدام الخل المخفف جداً لشطف الجلد، لأنو بيرجع الغلاف الحمضي الواقي بسرعة ويخلي بيئة الجلد صعبة على البكتيريا الممرضة.
في النهاية، أهم حاجة نطلع بيها من الكلام دة كلو، إننا نبطل عادة الدعك المستمر بالصابون القاسي والمطهرات القوية البتحرق الأخضر واليابس وتقتل الصالح والطالح، ونستبدلها بغسولات طبية لطيفة PH5. 5 تحافظ على توازننا البيولوجي الطبيعي وتخلي بشرتنا وحراسها في أمان.
#عيادات_بيت_العافية
#عيادة_الجلدية_أون_لاين