ليه البهاق زاد في بعض الناس وقل في آخرين؟ — دور البيئة والمحفزات
في البوستات الفاتت كلها كنا بنتكلم عن الجينات وتاريخ العائلة وزواج الأقارب، لكن في سؤال منطقي جداً بطرح نفسه؛ طالما الجينات دي ثابتة وبتنتقل من جيل لجيل بنفس الطريقة، ليه بنلاحظ إنو معدلات ظهور البهاق وسن الإصابة بيه بتتغير مع الزمن؟ الإجابة ببساطة هي إن الجينات براها ما بتكفي عشان تصنع المرض، الجينات دي محتاجة بيئة تحتضنها ومحفزات تصحيها من نومها.
خلونا نرجع لظاهرة تاريخية مثيرة جداً لفتت انتباه العلماء، في الفترة بين سنة 1970 وسنة 2004 في أمريكا وأوروبا، الأطباء لاحظوا إنو متوسط السن اللي ببدأ يظهر فيه البهاق عند الناس اتأخر بشكل ملحوظ، يعني الناس بقت تصاب بيهو في عمر أكبر مقارنة بالماضي
الخريطة الجينية للبشر هناك ما اتغيرت في التلاتين سنة دي، لكن الحصل هو إنو البيئة هي اللي اتغيرت للأحسن. القوانين الصارمة لحماية الهواء والماء من التلوث، قوانين السلامة المهنية في المصانع، انتشار ثقافة استخدام واقيات الشمس، وحتى التغييرات في نمط التغذية والبكتيريا النافعة في الأمعاء، كلها عوامل ساهمت في تأخير ظهور المرض.
لكن للأسف، حاليا نحن بنواجه التهديد العكسي تماماً في مجتمعاتنا، السوق ملان بمواد كيميائية صناعية ومستحضرات تجميل وكريمات تبييض وتفتيح غير مرخصة ومجهولة المصدر، والكارثة إنو المستحضرات دي بتحتوي على مركبات كيميائية قاسية جداً زي مركبات "الفينول"، اللي بتدخل الجلد وبتدمر خلايا الصبغة مباشرة، وبتفجر نوع سريع وعدواني جداً من المرض بنسميه طبياً "البهاق الكيميائي".
وهنا بتظهر الإحصائية اللي بتربط كل خيوط السلسلة دي مع بعض، الدراسات أثبتت إنو 28.3% من المرضى اللي أصيبوا بالبهاق الكيميائي، كان عندهم أصلاً تاريخ عائلي للمرض! الرقم ده بيأكد لينا المقولة الطبية الشهيرة: "الجينات هي البندقية المحشوة، والبيئة هي الزناد"، الزول بكون شايل الجين من غير مشاكل، لحد ما يجي يطبز عينو براهو ويستخدم كريمات تفتيح قاسية أو يتعرض لمواد كيميائية، فيقوم يضغط على الزناد ويفجر المرض.
والمحفزات ما بتقيف على الكيماويات بس، الإجهاد النفسي المزمن اللي بقينا عايشين فيه، الزعل المكتوم، اضطراب النوم والسهر، والضغوط الحياتية اليومية، دي كلها ما مجرد "حالة نفسية" وبتعدي، دي عوامل حقيقية بترفع مستوى حاجة اسمها "الضغط التأكسدي" في الجسم، وده بيرهق خلايا الصبغة جداً، وبخليها فريسة سهلة لجهاز المناعة، خاصة عند الناس اللي عندهم قابلية وراثية جاهزة.
الرسالة اللي دايرين نطلع بيها الليلة مفرحة ومهمة؛ إنت ما مجرد ضحية لجيناتك، التحكم في المحفزات البيئية دي، زي إننا نوقف تماماً استخدام كريمات التبييض العشوائية، ونحمي جلدنا، ونحاول ندير ضغوطنا النفسية قدر الإمكان، ممكن فعلياً يأخر ظهور البهاق أو حتى يمنعه تماماً عند الناس اللي شايلين الجينات دي.
في المنشور الجاي والأخير، حنلم كل الخيوط والأرقام اللي اتكلمنا عنها في السلسلة دي، وحنقدم ليكم الخلاصة النهائية والدليل العملي البسيط اللي مفروض أي بيت سوداني يعرفه عن البهاق والزواج.
#عيادة_الجلدية_أون_لاين
#عيادات_بيت_العافية
ملحوظة: فهرس السلسلة مثبت ببوست بأعلى الصفحة