الدليل العملي من الكريم لحدي الجراحة
وصلنا للمحطة الأخيرة في رحلتنا مع جلد الكفين والقدمي، بعد ما عرفنا في البوستات الفاتت كيف إنو السُماكة دي طيف واسع ببدأ من مجرد كالو بسبب مشية غلط، لحدي أمراض جينية ومناعية معقدة، الليلة حنختم بالخلاصة العملية: كيف بنعالج المشكلة دي في العيادة؟
العلاج عندنا في الجلدية ببدأ من "أساسيات المعمار" أو الوقاية، لأنو مهما أديناك أدوية غالية، لو استمر الضغط والاحتكاك، السُماكة حترجع، عشان كدة أول وأهم خطوة هي اختيار الحذاء المناسب طبياً وهندسياً عشان يوزع وزن الجسم صح وما يضغط على رؤوس العظام، ولبس الجوارب القطنية أو الماصة للرطوبة عشان نقلل الاحتكاك، وطبعاً لمرضى السكري، الفحص اليومي للقدمين وضبط مستوى السكر التراكمي هو طوق النجاة الوحيد لمنع المضاعفات.
لما نيجي للعلاج الدوائي، نحن بنمشي بتدرج هرمي حسب شدة الحالة:
الخط الأول والأساسي دايماً هو العلاج الموضعي والتحفيف، هنا بنعتمد على بطل قومي اسمه "اليوريا"، كريمات اليوريا بتركيزات بسيطة (10 إلى 20%) ممتازة جداً للصيانة والترطيب اليومي، لكن لو السُماكة شديدة وقاسية، بنرفع التركيز لـ 40% وممكن نغطي القدم بكيس نايلون بالليل عشان نكسر روابط الكيراتين القاسية دي.
معاها بنستخدم مقشرات زي حمض الساليسيليك عشان نذوب عيون السمكة والكالو، لكن هنا في تحذير صارم جداً: المقشرات القوية دي ممنوعة تماماً لمرضى السكري والناس العندهم تلف في الأعصاب، لأنها ممكن تاكل الجلد السليم وتعمل قرحة من غير ما المريض يحس.
وفي المرحلة دي دايماً بيجي دور "التحفيف" أو إزالة الجلد الميت بالمشرط في العيادة، وهو مريح جداً للحالات العادية، لكن في الأنواع الجينية زي (PC) البتكلمنا عنها المرة الفاتت، التحفيف القوي ممكن يزيد الألم لدرجة تخلي المريض ما يقدر يمشي، عشان كدة بنتعامل معاهو بحذر شديد.
لما تكون السُماكة عنيدة ومغطية مساحات كبيرة أو مأثرة على حياة المريض، بنضطر ننتقل للخط التاني، وهو العلاج الجهازي (حبوب أو حقن)، السلاح الأقوى هنا هو حبوب الريتينويدات، ودي مشتقات قوية جداً من فيتامين (أ) زي (Acitretin) بتشتغل من جوا الجسم عشان تفرمل وتبرمج انقسام خلايا الجلد وتمنع تراكم الكيراتين.
الحبوب دي مفعولها سحري في السُماكات الوراثية الشديدة، لكن عندها ضريبة، وأهمها إنها بتعمل تشوهات خطيرة جداً للأجنة، عشان كدة بنمنعها منعاً باتاً للحوامل أو السيدات في سن الإنجاب إلا بضوابط صارمة جداً.
أما لو كانت السُماكة دي ناتجة عن صدفية الراحة والأخمص، فهنا العلم اتطور جداً، وبقينا نستخدم "الأدوية البيولوجية"، ودي حقن ذكية جداً بتستهدف بروتينات التهابية محددة جوا الجسم وتقفلها، وبتنظف الجلد تماماً وترجعو لطبيعتو.
وفي السنوات الأخيرة، العلم دخل في الخط التالت، وهو التدخلات المتقدمة والحديثة جداً للحالات المستعصية، ومن الحاجات المدهشة استخدام حقن "البوتوكس" في باطن القدم، ما عشان التجميل، لكن لقوا إنها بتقلل العرق وبنفس الوقت بتسكن الألم الرهيب المصاحب للأنواع الجينية زي (PC) وبتخلي المريض يقدر يمشي تاني.
وفي أدوية حديثة جداً كانت بتستخدم لعلاج الأورام اسمها مثبطات (EGFR) زي الـ (Erlotinib)، بقينا نستخدمها بجرعات بسيطة للحالات الوراثية النادرة وجابت نتايج مبهرة.
وفي النهاية، لو كانت المشكلة أساساً ميكانيكية زي النتوء الراحي الصعب (IPK)، الحل بيكون جراحي عند دكتور العظام عشان يرفع العظمة النازلة ويعدل هندسة القدم، أو في حالات التشوه الشديد جداً، جراح التجميل بتدخل عشان يزيل الجلد السميك ده كلو ويزرع رقعة جلدية جديدة.
السُماكة في يديك وقدميك ما دايماً مجرد قلة ترطيب، دي لغة بحاول جسمك يتواصل بيها معاك، راقب التغييرات، اهتم بأساسيات الوقاية، ولو حسيت بألم أو تغيير غير طبيعي، باب العيادة دايماً مفتوح ليك.
نتمنى تكون السلسلة دي نورت ليكم جوانب كانت غايبة، ودمتم دايماً موفورين بالصحة والعافية.
#عيادات_بيت_العافية
#عيادة_الجلدية_أون_لاين