المرارة اتشالت.. طيب الفيتامينات تعمل شنو ؟
بنفتكر بعد عملية المرارة إن الحكاية انتهت و "الحصاوي" طلعت وارتحنا من الوجع، لكن الحقيقة إن جسمك من جوه ببدأ رحلة جديدة محتاجة "ضبط مصنع" وترتيب أفكار.
المرارة هي "المخزن الاستراتيجي" اللي بيجمع العصارة وبيركزها عشان لما تاكل ليك لقمة سمينة تنزل عليها وتفككها، ومن هنا بنقدر نطلع الفيتامينات الغالية والمهمة زي (A, D, E, K) اللي هي أساس نضارة الجلد وقوة النظر والمناعة وتجلط الدم.
لما المرارة تتشال، النظام بتغير؛ والعصارة بتنزل من الكبد "نقطة نقطة" وبتركيز ضعيف جداً، فبالتالي لما تاكل وجبة دسمة جسمك ما بيقدر يلاحق عليها، والنتيجة إن الدهون ومعاها الفيتامينات دي بتمر مرور الكرام وتطلع مع الفضلات من غير ما جسمك يضوق طعمها
وعشان كدة كتير من الناس بعد العملية بيحسوا بخمول أو جفاف في الجلد أو نقص في فيتامين (D) رغم إنهم بياكلوا كويس.
عشان ما تقع في فخ "سوء الامتصاص" ده، الحل ببدأ بتغيير التكتيك؛ يعني بدل ما تضغط على الكبد بوجبة واحدة تقيلة، قسم أكلك لوجبات صغيرة وخفيفة عشان العصارة البسيطة دي تقدر تقوم بالواجب.
والأهم من كدة، إن العلم هسي وفر لينا "بدائل ذكية" بتعوض غياب المخزن ده، زي مكملات الأملاح الصفراوية (Bile Salts) أو الـ Ox Bile، دي بتاخدها مع الأكل وبتقوم بدور المرارة في تكسير الدهون.
ولما تجي تشتري فيتاميناتك، اسأل الصيدلي عن الأنواع المستحلبة (Emulsified) أو اللي بتدوب في الموية، لأنها بتدخل الدم مباشرة وما محتاجة مرارة تعافر معاها.
وكمان ممكن تستبدل الزيوت التقيلة بزيوت خفيفة ولطيفة زي MCT Oil، ده زيت "خارق" بيمتصه الجسم من غير مجهود وبيديك طاقة فورية.
الحكاية ببساطة هي "إعادة ضبط إعدادات" للجهاز الهضمي، عشان نعيش بصحة ونستفيد من كل لقمة بناكلها ونحافظ على كنوز الفيتامينات جوه جسمنا.
#عيادات_بيت_العافية
#عيادة_الجلدية_أون_لاين