كتير جداً المريض في العيادة الأون لاين لما يشتكي من تساقط الشعر أو شحوب البشرة، أول ما يلقى نسبة الهيموجلوبين (الدم) ناقصة في الفحص، طوالي يقول ليك: "يا دكتور دمي واقع، أكتب لي حبوب ولا درب حديد عشان أرفعه". وهنا بنقع في واحد من أشهر الفخاخ الطبية!
عشان نفهم القصة، لازم نعرف إنو كريات الدم الحمراء دي هي "أسطول النقل" البشيل الأوكسجين ويوزعه لكل شبر في جسمك، لما عدد عربات الأسطول ده يقل، بنسمي الحالة دي "أنيميا" (فقر دم).
لكن عشان نعرف سبب الأنيميا ونعالجها صاح، ما بنعاين بس لكمية الدم، لازم نعاين لـ "مواصفات" الخلايا دي، وهنا بيجي دور رقمين مهمات جداً في ورقة الفحص، دايماً قاعدين تحت الهيموجلوبين طوالي: الـ MCV والـ RDW.
الـ MCV ده ببساطة بيقيس "حجم" الكرية الحمراء. لو الحجم طلع صغير، معناها المصنع (نخاع العظم) بينتج خلايا قزمية صغيرة، وأشهر سببين للموضوع ده هم: نقص الحديد (الأكثر شيوعاً)، وأنيميا البحر الأبيض المتوسط أو الثلاسيميا (وهي خلل جيني).
طيب، كيف فحص الـ CBC بيقدر يدينا تلميح قوي للتفريق بينهم من غير ما نعمل فحص مخزون حديد مكلف في البداية؟ هنا بيجي دور الرقم الساحر الـ RDW. اللي بيقيس "التباين أو الاختلاف" في أحجام الخلايا جوة الدم، يعني هل الخلايا دي كلها مقاس واحد وموحدة، ولا أحجامها ملخبطة ومختلفة؟
• في حالة نقص الحديد: المصنع جوة العظم بيكون بعاني من شح في الموارد (الحديد)، فيوم يلقى شوية حديد من الأكل يقوم يصنع خلية حجمها معقول، ويوم ما يلقى يقوم يصنع خلية صغيرة شديد ومكرمشة، فينتج أسطول ملخبط، خلايا كبيرة وصغيرة، وهنا الجهاز بيقرا إنو الـ RDW "مرتفع" (يعني في تباين واختلاف كبير في الأحجام).
• أما في حالة الثلاسيميا: المصنع موارده من الحديد بتكون ممتازة ومخازنه مليانة، لكن "الخريطة الجينية" حقت التصنيع فيها عيب، فالمصنع بنتج خلايا صغيرة جداً، لكنها "متطابقة" زي الكربون، كلها نفس المقاس الصغير، وبينتج كده أسطول موحد الحجم تماماً، وهنا الجهاز بيقرا إنو الـ RDW "طبيعي".
شفتوا كيف رقم رياضي بسيط في ورقة الـ CBC بيقدر يوفر علينا حيرة كبيرة، وممكن يخلينا نوقف مريض الثلاسيميا من إنه يبلع في حبوب حديد شهور طويلة وهو أصلاً ما محتاجها (وبالعكس، ممكن تضره وتتراكم في كبده)؟
كده اطمأنينا على أسطول النقل والموارد، وفي البوست الجاي، حنتعرف على "قوات الطوارئ" البتقفل الجروح وتوقف النزيف.. متين بتستنفر وتزيد لدرجة بتخلع المريض؟ ومتين بتتمرد؟ استعدوا لقصة "الصفائح الدموية".
#عيادة_الجلدية_أون_لاين
#عيادات_بيت_العافية