الأمراض بتتفاوت بين البروح براهو بدون علاج أساسا وبين المزمن اللي ما بتنفع فيهو العلاجات كلها، وبين الطرفين ديل في طيف واسع من المسارات للمرض
الفكرة الأساسية هو أن السؤال المناسب اللي مفروض تتعلموا تسألوهو بدل (الحل الجذري) هو: شنو هو مسار المرض natural history وشنو هي توقعات التعافي والتكرار
كأمثلة نبدأ بال Palmoplantar Pustulosis وهو مرض نادر لحسن الحظ (شوف الصورة)؛ المرجع بقول عن علاجها:
"مسار المرض عادة مطول، التعافي نادر، العلاج الفعال صعب المنال ومحبط عادة"، وزيها ال Syringoma اللي بتظهر كحبوب حول العيون، وزيها ال Idiopathic Guttate Hypomelanosis اللي بتظهر كنقاط بيضاء في الأطراف، ديل والزيهم موش ما عندهم حل جذري بس، وإنما ما عندهم حل فعال أساسا
وماننسى حب الشباب؛ وهو بالتعريف مرض مزمن، وبتتفاوت حدته وتكراره حسب التركيبة الجينية للشخص، ورغم انو في علاجات فعالة ليهو، إلا أنو عودته هي القاعدة، ومن المزعج بصدده إنتشار إسطورة انو الروكيوتان (Isotretinoin) هو حل جذري ليهو؛ دايما بقول للعيانيين البجوا بالفهم ده: إذا كان في حل جذري فعلا ليه ما نديهو لكل الناس من أول حباية تظهر ونقضي على المرض من العالم؟
فينتبهوا انو منطق الحل الجذري ده بهزم روحو، لانو الامراض اللي ظهر ليها حل جذري زي الجدري مثلا، ما عاد في زول بسمع بيها من الاساس، فما منطقي انو مرض شائع، يكون عندو حل جذري، وده للأسف بيؤدي لسوء إستعمال الروكيوتان وبزيد من فرص تسببو في مضاعفات
من ناحية تانية؛ الأمراض المعدية اللي بتسببها البكتريا والفيروسات والبكتيريا، ممكن تتعالج بالمضادات المناسبة لكن ما في دوا حيمنع الإصابة بالعدوى من جديد إلا في الانواع اللي عندها تطعيم بينتج عنه مناعة طويلة
برضو بألفت نظر المصابين بالأمراض الجلدية المزمنة زي الصدفية انو يتعاملوا معاها زي تفكيرهم في الضغط والسكري، كحاجه مزمنة محتاجة علاج مطول، مع تفاؤل انو على عكسها بلقوا معاها فترات راحة من العلاج
وطبعا هناك أمراض بتروح براها؛ دي علاجها تخفيف الأعراض بتاعتها زي البرجم، وبرضو الانواع اللي بنعالجها خوفا من مضاعفاتها زي الحزام الناري، وبرضو الممكن تترك من غير أي علاج زي الصدفية النقطية (بتروح عادة في ٣ شهور) أو البهاق vitiligo في المناطق الحساسة لانو الادوية عندها آثار جانبية سهله الحدوث بالمنطقة دي وإذا كان المريض متصالح معاها وهي مخفية وما مأثره على حياتو، فالاحسن ترك الفرصة ليها للتحسن براها وهلم جرا
وفي كل الأمراض، المحتاج يعملوا الزول بدل السعي للحل الجذري هو الوعي بطبيعة المرض وتعلم طرق الوقاية والتخفيف منو والالتزام بيها، سواء كانت الوسائل العامة المفيدة لكل الأمراض زي الأكل الصحي والرياضة والنوم الجيد والراحة النفسية، أو الوسائل الخاصة بكل عائلة مرضية زي تجنب المهيجات والترطيب في الحساسيات
الوعي بالحاجات دي بسهل المقابلات الطبية، وبخلي المريض أقرب للتعافي والاستجابة، وبكسر حلقة انو يلف على دكاترة كتار سعيا نحو حل جذري ما حيلقاهو عند زول
#عيادات_بيت_العافية
#عيادة_الجلدية_أون_لاين