بإستشارة أون لاين لمريضة سودانية تسكن بفرنسا، كان من الواضح لي أنها بتعاني من الحزاز المتصبغ، وتم عمل خزعة جلدية ليها هناك وجات النتيجة الغريبة: ذئبة حمراء Lupus
الخزعة بتفحص قطعة صغيرة جداً من الجلد، وبتورينا التغيرات المجهرية: التهاب، تلف في الطبقة القاعدية، صبغة ساقطة، خلايا مناعية لكن متخصص علم الأمراض البفسرها ما بشوف المريض قدامو، ولا بشوف توزيع المرض، ولا تاريخه، ولا تطوره مع الزمن. عشان كده، أي نتيجة خزعة لازم تتفسر دائماً على ضوء الصورة السريرية والأعراض، موش بمعزل عنها.
في الحالة دي، حصل خطأ شائع جداً: التشخيص التفريقي وقت طلب الخزعة كان منحاز لفكرة الذئبة (Lupus)، رغم إنو الصورة السريرية ما بتدعمها إطلاقاً. لا في احمرار نشط بمنتصف الوجه، ولا قشور، ولا حدود واضحة، ولا ضمور ولا تندب، ولا أي نمط ذئبي معروف.
الموجود كان تصبغات بنية رمادية منتشرة في الوجه والرقبة، بصورة صامتة، بطيئة، من غير التهاب واضح ودي صورة أقرب ما تكون للحزاز المتصبغ (Lichen Planus Pigmentosus).
النتيجة النسيجية نفسها لو اتقرت بعين مفتوحة كانت واضحة: التهاب واجهة جلدي (interface dermatitis) مع سقوط صبغة ووجود melanophages بكثرة، بدون مخاط (mucin)، بدون علامات ذئبة نوعية. دي سمات كلاسيكية للحزاز المتصبغ. لكن لأن السؤال السريري كان “هل دي ذئبة؟”، القراءة اتوجهت ذهنياً في نفس الاتجاه، واتغفل المعنى الحقيقي للنتيجة.
وده درس مهم: أحياناً ما المشكلة في الفحص، المشكلة في السؤال البنسألو.
الأمر بزداد تعقيد لما نتكلم عن الجلد الملوّن. معظم كتب الجلدية الكلاسيكية مكتوبة على أساس جلد أبيض أو فاتح. أمراض كتيرة بتظهر بشكل مختلف تماماً في الجلد الداكن: الالتهاب ممكن يكون خافت، والمرض بظهر في شكل تصبغ أكتر من احمرار، والمسار بكون أهدأ لكن أثره اللوني أعنف. الحزاز المتصبغ مثال واضح على مرض شائع في آسيا وأفريقيا والشرق الأوسط، لكنه مهمّش في المراجع الغربية.
عشان كده، خبرة الطبيب بالمناطق الجغرافية، وبأنماط الجلد المختلفة، وبالأمراض الشائعة في مجتمعه، أحياناً بتكون أهم من ألف تحليل معقد. فطبيب ما شاف الحزاز المتصبغ بجلد ملون كتير، ممكن يفسره كذئبة، أو ككلف، أو كتحسس مزمن. وطبيب عاش وشاف الحالات دي يومياً، بيشوف التشخيص من أول نظرة.
عشان كده أي تشخيص ما متماشي مع الصورة السريرية لازم يتراجع، مهما كان اسمو كبير أو فحوصاتو معقدة.
#عيادة_الجلدية_أون_لاين
#عيادات_بيت_العافية