“أنا وبنت خالتي نفس الدرجة تقريباً لكن بشرتي بتتعب بسرعة وهي بشرتها صافية”. الناس بتفتكر إنو طبيعة البشرة بتتحدد بعامل واحد اسمو اللون، وإنو لو اتحكمنا فيهو فخلاص سيطرنا على كل شيء. لكن الحقيقة الطبية أبعد من كده بكتير
أول حاجة لازم تستقر في الوعي هي إن البشر كلهم فصيلة واحدة، والاختلافات الجينية بين الأفراد داخل نفس المجتمع أو نفس العائلة ممكن تكون أكبر من أي تصنيف ساهل زي “أفارقة وأوروبيين” أو “سمار وبياض”. دي ما فلسفة ولا سياسة، دي طبيعة علم الجينات. يعني ممكن تلقى اتنين سودانيين اختلافاتهم في جينات معينة أكبر من اختلاف واحد فيهم مع شخص من قارة تانية في نفس الجينات. عشان كده ما بتقدري تختزلي الجلد في لافتة واحدة.
ثاني حاجة، حتى جينات اللون ذاتها ما جين واحد ولا مفتاح واحد. في جينات مرتبطة بتكوين الميلانين وتوزيعه ونوعه وحجم حبيباته داخل الخلايا، وفي جينات بتحدد كيف الميلانين يتوزع كـ “مظلة حماية” فوق نواة الخلية، وفي جينات بتحدد كيف الجلد يتعامل مع الشمس والالتهاب.
عشان كده بتلقى ناس متقاربين في الدرجة لكن مختلفين جداً في السلوك: واحدة بتطلع فيها بقع شمس بسرعة، والتانية ما بتطلع، واحدة أي حبة صغيرة بتسيب أثر، والتانية الأثر عندها خفيف. الفرق هنا ما بسبب درجة اللون، بل لأن محركات المعمار مختلفة.
وهنا بنرجع لفكرة المعمار البتكلمنا عنها أمس: الجلد ما مجرد صبغة ملونة، الجلد جهاز دفاعي ذكي. عندك جينات بتخلي الجلد يعرف يحبس الموية ويحافظ على ترطيبه الداخلي ويعمل تقشير طبيعي غير مرئي، وعندك جينات بتخلي الاستجابة للالتهاب “هادية” أو “حادة”، وعندك جينات بتأثر على سماكة الأدمة ونوعية الكولاجين والمواد البتدي الامتلاء.
لما جزء من السلسلة دي يضعف، الميلانين ذاتو مرات بيشتغل كأنو “حارس إضافي” يجي يسد النقص، فتظهر التصبغات. يعني في حالات كتيرة التصبغ ما هو مرض قائم بذاتو، بل هو أثر جانبي لمعركة داخلية صغيرة: جفاف، احتكاك، التهاب صامت، شمس، أو خلطات بتستفز الجلد يومياً.
والمنشور الجاي حنبدأ نفك واحدة من أهم الحلقات دي: حلقة الملمس والنعومة، لأنو كتير من الناس بتجري وراء لون أفتح بينما الكاميرا بتفضح إن المشكلة الحقيقية هي خشونة سطحية وتشتت ضوء سيء، ودي بتتصل مباشرة بحاجز الجلد وبروتينات السطح وبطريقة غسيلنا وترطيبنا، يعني بتتصل بالصورة الكبيرة ذاتها.
#عيادات_بيت_العافية
#عيادة_الجلدية_أون_لاين