ممكن تكون الشكوى إنو عندي "كلف" ويكون الطلب كريمات تفتيح وخلطات ليهو، لكن الحقيقة إنه التصبغات بالوجه عالم كبير ومحتاج وقفة ورؤية طبية عميقة بـ"روقة" قبل ما نلمس الوش بأي مادة،
السيدة الظاهرة في الصورة دي هي أوضح مثال للبنقول فيهو إنو التشخيص الدقيق أهم بكتير من وصفة العلاج نفسها، ففي البداية كان ممكن أي زول يشوف الصورة اليمين ويقول ده كلف مختلط سطحي وعميق، لكن بالتدقيق في مظاهر الورم والالتهاب وتوزيع اللون اللي ما كان واخد شكل "الشبكية" المعتاد، ومع مراجعة تاريخها مع العلاجات القديمة اللي كانت كل ما تستخدمها حالتها بتزيد سوء
وصلنا لنتيجة إنه الحالة دي ما كلف أصلاً، بل هي "حزاز صباغي"، وده مرض مناعي التعامل معاهو بيختلف جذرياً عن الكلف العادي، فعوضاً عن الكريمات المفتحه ذات الأثر التهيجي اللي بتزيد الالتهاب وتخلي الحالة تعاند زيادة، الخطة اتغيرت تماماً وبقت إننا نهدي النشاط المناعي في المنطقة دي باستعمال كريمات مثبطة للمناعة بس من النوع الما فيهو كورتيزول عشان نقدر نستمر عليها فترة طويلة من غير ما نضر الجلد
واستخدمنا معاها مادة مفتحة لطيفة جداً وغير مهيجة عشان تتعامل مع الجزء السطحي من اللون بس، والنتيجة بعد شهر واحد بس زي ما شايفين في الصورة اللي على الشمال كانت تحسن ملحوظ جداً وبطريقة ما حصلت ليها مع كل المحاولات السابقة، مع رضى المريضة لأنو وضحنا الاهداف والتوقعات بشكل واضح دون وعود غير واقعية بزوال الامر بسرعه.
الملاحظ برضو بعد الجلد هدأ والتهيج راحت، ظهر لينا بوضوح اللون الرمادي المزرق وده هو التصبغ العميق الموجود في طبقة "الأدمة" واللي كان متدسي ورا زحمة الالتهاب والتهيج، وأسي بس بنقدر نقول إننا وضعنا رجلينا في الطريق الصحيح بخطة واضحة ومبنية على فهم حقيقي لطبيعة المرض
علاج التصبغات ما "شطارة" في قوة الكريمات، بل هو "فراسة" في التشخيص الصحيح عشان ما نكون بنحرق في الجلد ونحن قايلين روحنا بنعالج فيهو.
تم استئذان المريضة قبل نشر الصورة
#عافية_التصبغات #عيادة_الجلدية_أون_لاين #عيادات_بيت_العافية