منع الذبابة من الوصول لجلدك هو خط الدفاع الأول والأرخص قبل ما ندخل في دوامة القروح والعلاجات.
أكبر غلطة بيقع فيها الناس هي الاعتماد الكامل على الناموسيات العادية. تذكروا إني قلت ليكم ذبابة الرمل دي حجمها "تلت" حجم البعوضة ؟ عشان كدا، الناموسيات العادية ذات الفتحات الكبيرة (اللي بتدخل الهواء) بالنسبة لذبابة الرمل دي عبارة عن "باب مفتوح" بتدخل وتمرق منه عادي.
فلو قدرت تتحصل على "ناموسيات مشبعة بالمبيد" (ITNs) فدي ممتازة لأنو المبيد بيطرد الذبابة حتى لو الفتحات واسعة. لو ما لقيت إلا العادية، حاول تختار النوع "الضيق" جداً (Fine Mesh)، وتأكد إنها مقفولة تماماً تحت المرتبة، لأنو الذبابة دي خبيثة وممكن تدخل من أي فرقة صغيرة.
في الظروف دي صعب نقول للناس اشتروا "بخاخ طارد حشرات" مستورد وغالي. لكن لحسن الحظ، أرضنا فيها البديل. فزي ما قلنا قبل كدا، النيم فيهو مادة (Azadirachtin) بتشتغل كـ "رادار تشويش" للحشرات وبتطرد ذبابة الرمل بفعالية عالية. حضر الزيت ده زي ما شرحنا سابقا كدهان للأجزاء المكشوفة من الجسم (اليدين والرجلين والوجه) بالذات وقت المغرب والفجر. الريحة ممكن تكون قوية شوية، لكنها "درع" حقيقي بيمنع اللدغ.
ولأنو الذبابة دي عندها "دوام رسمي" بيبدأ مع غروب الشمس. ففي الوقت ده بالذات، حاول قدر الإمكان تلبس ملابس بأكمام طويلة، وبنطلونات طويلة، وشرابات لو أمكن. أي سنتيمتر تغطيه من جلدك هو مكسب. ولو الجو سخن، ركز على تغطية الأطفال الصغار لأنهم الأكثر عرضة للخطر وهم نايمين.
برضو ارفع نفسك عن الأرض لأنو الذبابة دي "كسولة" في الطيران وبتقفز قفزات قصيرة قريب من الأرض ، فالنوم على الأرض (الواطة) هو مخاطرة كبيرة. حاولوا دائماً تنوموا في سراير مرتفعة (عناقريب) وتبعدوا عن الأرض قدر الإمكان. النوم العالي بيقلل جداً من احتمالية وصول الذبابة ليك مقارنة بالنوم على فرشات في الأرض مباشرة.
في البوست الجاي والأخير، حنتكلم عن "نظافة المعسكر والبيئة".. كيف نتخلص من الأنقاض والزبالة عشان ما نعمل للذبابة "فندق" جنب بيتنا؟
حفظكم الله وحماكم.
#عيادة_الجلدية_أون_لاين #عيادات_بيت_العافية