موضوعي الليلة ما مجرد "بوست" توعوي روتيني بمر علينا في التايم-لاين، فالحقيقة اللي دفعتني لفتح الملف ده أسي هو واقع بشوفو يوميا في العيادة الأون لاين، قصص بتؤكد حقيقة واحدة: اللشمانيا رجعت، ورجعت بقوة.
الملاحظة الأخطر اللي خلتني أستعجل بالكتابة، هي الزيادة المضطردة والمقلقة في الحالات، وتحديداً علمي ببؤرة وبائية واضحة داخل ولاية الخرطوم نفسها، جاتني منها استشارة من أطباء على الأرض، مما يعني أن جرس الإنذار ضرب فعلا.
وعشان نفهم الحاصل، لازم نرجع ورا شوية ونفتح دفاتر التاريخ، فاللشمانيا دي "ضيف تقيل" وقديم في بلدنا، وأول حالة سودانية اتسجلت رسمياً كان سنة 1911 في جبال النوبة.
لكن الدرس الأقسى، والسيناريو اللي بنخاف يتكرر، هو وباء الخرطوم الشهير سنة 1985-1986. الدرس اللي اتعلمناه بالطريقة الصعبة وقتها هو إنو اللشمانيا الجلدية دي بالذات، لما تنفجر كوباء نتيجة للنزوح والحركة، بتبقى "عادلة" عدالة قاسية جداً؛ فهي لا بتفرز بين وزير ولا غفير، ولا بتعرف ده ساكن في عشة وده في بيت مسلح؛ الكل أمام "ذبابة الرمل" سواء.
والسبب في "ديمقراطية المرض" دي بسيط ومخيف في نفس الوقت؛ وهو إنو النزوح الهائل اللي حصل لينا بسبب الحرب، خلى كتار مننا يتحركوا من مناطق "نظيفة" ما فيها المرض، لمناطق موبوءة أو بيئات جديدة فيها الذبابة والقوارض.
ونحنا كأهل مدن أو مناطق آمنة سابقاً، أجسامنا بتعتبر "صفحة بيضاء" (Immunologically Naive) ما عندها أي ذاكرة مناعية أو معرفة سابقة بالطفيلي ، فبمجرد ما الذبابة تلدغ، الجسم بيستسلم للمرض. ده غير إنو ركام الحرب، والبيوت المهجورة، وتراكم النفايات، خلق "فنادق 5 نجوم" لذبابة الرمل عشان تتكاثر وتعيش وسطنا.
أنا ما بكتب عشان أخوفكم، لكن عشان نتسلح بالمعرفة، لأنو المعرفة في الزمن ده هي نص العلاج. اللشمانيا الجلدية، ورغم شكلها المزعج، هي مرض ما بقتل ، وعلاجه ممكن ومقدور عليه لو اتصرفنا صاح. وعشان كدا، قررت أكتب ليكم سلسلة سردية مفصلة، حنمشي فيها خطوة خطوة، من "كيف تعرف الحبة دي لشمانيا ولا حاجه تانية؟" لحدي "كيف نعالجها بأبسط المتاح لو العلاج الأمثل ما متوفر؟".
في البوست الجاي، حنمسك "جلودنا" دي ونقرأها سوا، عشان نعرف كيف بتبدأ الحكاية من قرصة صغيرة لحدي ما تبقى قرحة تشبه "فوهة البركان"؟ وكيف تميزها براك قبل ما تمشي للدكتور؟
حفظ الله البلاد والعباد، وربنا يغطي عليكم جميعاً.
#عيادة_الجلدية_أون_لاين
#عيادات_بيت_العافية
فهرس السلسة كاملة
https://www.facebook.com/share/p/1Cxci5HWLE/